2025-ci ildə işğaldan azad olunmuş ərazilərin bərpası və yenidən qurulması istiqamətində həyata keçirilən layihələrin maliyyələşdirilməsi üçün dövlət büdcəsindən 4,5 milyard manat vəsait ayrılıb.
Cagdas.az xəbər verir ki, bunu maliyyə naziri Sahil Babayev Milli Məclisin plenar iclasında “2025-ci il dövlət büdcəsinin icrası haqqında” qanun layihəsinin müzakirəsi zamanı deyib.
Nazirin sözlərinə görə, ayrılan vəsaitin əsas hissəsi – 4 milyard manatı infrastruktur layihələrinin icrasına yönəldilib. Bundan əlavə, 440 milyon manat sosial təyinatlı layihələrin, 10 milyon manat müdafiə və hüquq-mühafizə sahəsinə aid layihələrin maliyyələşdirilməsinə sərf olunub.
S.Babayev bildirib ki, azad edilmiş ərazilərdə təhlükəsiz yaşayışın və quruculuq işlərinin təmin olunması məqsədilə 75 milyon manat vəsait minalardan təmizləmə tədbirlərinə ayrılıb.
Nazir qeyd edib ki, bu vəsaitlər regionda genişmiqyaslı bərpa-quruculuq prosesinin davam etdirilməsi, infrastrukturun yenidən yaradılması və keçmiş məcburi köçkünlərin doğma yurdlarına qayıdışının sürətləndirilməsinə xidmət edir.
