ABŞ-ın ədliyyə naziri Pem Bondi X sosial şəbəkəsində verdiyi açıqlamada bildirib ki, ABŞ səlahiyyətli orqanları Bella 1 adı ilə də tanınan, Rusiya bayrağı altında üzən “Marinera” neft tankerinin heyət üzvləri barəsində cinayət işi qaldırmağı planlaşdırır. Tankerin ələ keçirilməsi ilə bağlı Rusiyadan da ilk rəsmi açıqlama verilib.
Cagdas.az xəbər verir ki, Bondinin sözlərinə görə, gəmi heyəti Venesuela və İrandan sanksiyaya məruz qalmış nefti daşıyan tankerin saxlanılmasının qarşısını almaq üçün “ümidsiz və riskli addımlar” atıb.
O qeyd edib ki, Sahil Mühafizəsinin göstərişlərinə tabe olmadıqları üçün tanker heyəti barəsində genişmiqyaslı araşdırma başlanılıb və təqsirli bilinən şəxslər barəsində cinayət məsuliyyəti tədbirləri görüləcək.
ABŞ ədliyyə naziri əlavə edib ki, Ədliyyə Departamenti sanksiyaların pozulması ilə bağlı digər gəmiləri də izləyir və federal qurumların tələblərinə əməl etməyən hər kəs ciddi şəkildə cəzalandırılacaq.
Bundan əvvəl Ağ Evin mətbuat katibi Karolin Levitt gündəlik brifinqdə bildirmişdi ki, ABŞ hakimiyyəti “Marinera” tankerinin heyət üzvlərini federal qanunların pozulması iddiası ilə mümkün məhkəmə prosesi üçün ABŞ ərazisinə apara bilər.
Pentaqon isə daha öncə Rusiyaya məxsus “Marinera” neft tankerinin Şimali Atlantik okeanında saxlanıldığını açıqlamışdı. ABŞ müdafiə naziri Pit Heqseth bu addımı Venesuela neftinə qarşı tətbiq edilən sanksiyalarla əlaqələndirmişdi.
