Atatürk Hava Limanında inşa olunan “Terminal İstanbul” layihəsinin ilk mərhələsinin yaxın günlərdə istifadəyə verilməsi gözlənilir. Türkiyənin sənaye və texnologiya naziri Mehmet Fatih Kacır bildirib ki, layihə dünyanın ən böyük sahibkarlıq mərkəzinin təməlini qoyacaq və qısa müddətdə fəaliyyətə başlayacaq.
Çağdaş.Az xəbər verir ki, Nazir sosial şəbəkə hesabında paylaşdığı videoda Atatürk Hava Limanında həyata keçirilən layihə üzrə son hazırlıq işlərini nümayiş etdirərək, “Terminal İstanbulun başlanğıc mərhələsi – dünyanın ən böyük sahibkarlıq mərkəzinə atılan ilk addımdır. Tezliklə” sözlərini qeyd edib.
Minlərlə startap və investor üçün yeni mərkəz
Türkiyənin Milli Texnologiya Hərəkatı çərçivəsində yaradılan Terminal İstanbul minlərlə sahibkarı, texnologiya şirkətini və investoru bir araya gətirməyi hədəfləyir. Mərkəzdə beynəlxalq akselerasiya proqramları, birgə iş məkanları və inkubasiya mərkəzləri fəaliyyət göstərəcək.
Layihə yalnız ofis sahəsi təqdim etməklə kifayətlənməyəcək. Burada ideyanın formalaşmasından məhsulun hazırlanmasına, kommersiyalaşdırmadan investisiya cəlbinə və qlobal bazarlara çıxışa qədər startapların bütün inkişaf mərhələləri üçün kompleks dəstək mexanizmi yaradılacaq.
Terminal İstanbul dünyanın aparıcı akseleratorlarından biri olan “Techstars” ilə əməkdaşlıq edəcək. Bundan əlavə, Pakistan, Qətər, Paris və London başda olmaqla müxtəlif ölkələrdə qurulan beynəlxalq əlaqələr və türk diasporu vasitəsilə Türkiyə startaplarının qlobal bazarlara çıxışı dəstəklənəcək.
Sənaye və Texnologiya Nazirliyinin həyata keçirdiyi “Tech Visa” proqramı sayəsində dünyanın müxtəlif ölkələrindən perspektivli startapların Terminal İstanbulda fəaliyyət göstərməsi mümkün olacaq. “Soft landing” proqramları, qrantlar, güzəştlər və stimullaşdırıcı mexanizmlər vasitəsilə xarici şirkətlərin Türkiyə bazarına uyğunlaşması asanlaşdırılacaq, yerli startapların isə beynəlxalq bazarlara çıxışı sürətləndiriləcək.
Mərkəzdə ortaq laboratoriyalar, bahalı avadanlıqlardan birgə istifadə imkanları, rəqəmsal infrastruktur və tədqiqat dəstəyi təqdim ediləcək. Bu imkanların xüsusilə dərin texnologiya sahəsində fəaliyyət göstərən startapların inkişafını sürətləndirəcəyi gözlənilir.
Bundan başqa, süni intellekt, biotexnologiya, mobillik, kosmik texnologiyalar və digər istiqamətlər daxil olmaqla 34 müxtəlif texnologiya sahəsi üzrə ixtisaslaşmış ekosistem formalaşdırılacaq.
Terminal İstanbul sahibkarları, investorları, iri şirkətləri və dövlət qurumlarını eyni məkanda birləşdirən canlı innovasiya kampusu kimi fəaliyyət göstərəcək. Burada investor görüşləri, hakatonlar, təlim proqramları, idarəçi akademiyaları və müxtəlif texnologiya tədbirləri təşkil olunacaq.
Layihənin Türkiyənin qlobal innovasiya və texnologiya ekosistemində rəqabət qabiliyyətini artıracaq strateji mərkəzlərdən birinə çevrilməsi hədəflənir.
