Ermənistanın ABŞ-dakı səfiri Narek Mkrtçyan ABŞ Geoloji Xidmətinin Beynəlxalq Proqramlar İdarəsinin direktoru Uilyam Kanninqemlə görüşüb.
Cagdas.az xəbər verir ki, bu barədə Ermənistanın ABŞ-dakı səfirliyinə istinadən “Armenpress” məlumat yayıb.
Görüş zamanı ABŞ-ın geoloji xidmət sisteminin formalaşdırılması təcrübəsi və bu təcrübə əsasında mümkün əməkdaşlıq istiqamətləri müzakirə olunub. Tərəflər, həmçinin nadir və strateji əhəmiyyət daşıyan minerallar sahəsində Ermənistan-ABŞ əməkdaşlığının inkişaf perspektivləri barədə fikir mübadiləsi aparıblar.
Söhbət zamanı bu ilin may ayında imzalanmış Hərtərəfli Strateji Tərəfdaşlıq Xartiyasının, eləcə də kritik minerallar və nadir torpaq elementlərinin hasilatı və emalı sahəsində təchizatın təmin olunmasına dair Çərçivə Memorandumunun əhəmiyyəti xüsusi vurğulanıb.
Tərəflər qeyd ediblər ki, sözügedən sənədlər iki ölkə arasında geologiya, faydalı qazıntıların kəşfiyyatı və strateji xammal ehtiyatlarının idarə olunması sahələrində əməkdaşlığın genişləndirilməsi üçün yeni imkanlar yaradır.(modern.az)
