Suriyada devrilmiş rejimin lideri Bəşər Əsəd və qardaşı Mahir Əsəd barəsində Dəməşqdə qiyabi məhkəmə prosesi rəsmi şəkildə başlanıb.
Çağdaş.Az xəbər verir ki, Dəməşq Ədalət Sarayında fəaliyyət göstərən dördüncü cinayət məhkəməsində keçmiş rejim rəhbərliyinə qarşı qiyabi məhkəmə araşdırması davam edir.
Məhkəmə sənədlərinə görə, proses yalnız Əsəd və onun ailə üzvləri ilə məhdudlaşmır. İttiham olunanlar arasında keçmiş müdafiə naziri Fəhdi Casim əl-Freyic, hərbi kəşfiyyat rəhbəri Luay əl-Əli və kəşfiyyat şöbəsinin rəhbəri Fəvik Nasır kimi yüksək vəzifəli şəxslər də yer alır.
Həmçinin Məhəmməd Eymən Əyyuş və komandir Talal Hüseyn də ittiham olunanlar siyahısına daxil edilib. Bu şəxslərin hamısı mülki əhaliyə qarşı cinayətlər və təhlükəsizlik pozuntularında günahlandırılır.
Təqsirləndirilənlər arasında Əsədin əmisi oğlu Atef Necib də var. O, 2011-ci ildə başlayan xalq etirazlarını zorakılıqla yatırmaqda və Dəra bölgəsində repressiyalara rəhbərlik etməkdə ittiham olunur.
Siyahıda həmçinin digər qohumu Vassim əl-Əsəd, 2013-cü ildə Tedmur hadisələri ilə bağlı adı hallanan Amcad Yusif və mülki yaşayış məntəqələrini bombalamaqda iştirak edən pilotlar da yer alır.
Məlumata görə, Əsəd və ona yaxın şəxslərin Rusiyaya sığınması səbəbindən məhkəmə prosesi qiyabi qaydada aparılır. Məhkəmə bir sıra qaçaq şəxslərlə bağlı rəsmi bildiriş proseduruna start verib.
Bu şəxslərin müharibə cinayətləri və insanlığa qarşı cinayətlərə görə mühakimə olunması tələb edilir.
Suriya vətəndaş müharibəsi ərzində 13 il ərzində yarım milyondan çox insan həyatını itirib, on minlərlə insan isə həbsxanalarda yoxa çıxıb və ya işgəncələrə məruz qalıb.
