İran ölkənin enerji infrastrukturuna qarşı yeni hücumların baş verəcəyi təqdirdə bölgədəki ABŞ və İsrailə məxsus neft-qaz obyektlərinə zərbələr endirəcəyini bəyan edib.
Çağdaş.Az xəbər verir ki, bu barədə İranın Fars Xəbər Agentliyi məlumat yayıb.
Mənbənin sözlərinə görə, mümkün hədəflər siyahısına xüsusilə Yaxın Şərqdə fəaliyyət göstərən ABŞ neft və qaz şirkətlərinə məxsus obyektlər daxil edilib.
Məlumatda bildirilir ki, İran enerji infrastrukturuna qarşı təkrarlanan hücumlara cavabsız qalmayacaq və zərbələrin davam etməsi halında cavab tədbirləri genişləndiriləcək.
Bundan əvvəl İranın “Al Alam” TV telekanalı İsrail hücumları nəticəsində Xuzistan əyalətində yerləşən neft-kimya kompleksinin bəzi hissələrinin zədələndiyini xəbər vermişdi.
Daha əvvəl isə İsrail Silahlı Qüvvələri İranın Bəndərə Mahşəhr şəhərində yerləşən neft-kimya obyektinə hücum həyata keçirildiyini açıqlamışdı.
İran və İsrail arasında son günlər artan qarşılıqlı hücumlar regionda gərginliyi daha da yüksəldib. Ekspertlər enerji obyektlərinin hədəfə alınmasının qlobal enerji bazarlarında ciddi dalğalanmalara səbəb ola biləcəyi barədə məlumat vermişdi.
