Yaxın Şərqdə gərginlik yenidən kəskinləşib. İranın İsrailə raket hücumlarından sonra İsrail ordusu İranda bir sıra hərbi hədəflərə qarşı genişmiqyaslı əməliyyat həyata keçirib. Məlumata görə, hava zərbələri nəticəsində Tehran, İsfahan, Təbriz və Karac şəhərlərində partlayış səsləri eşidilib.
Çağdaş.Az xəbər verir ki, İsrail ordusu açıqlamasında hücumların İranın hərbi obyektlərini hədəf aldığını bildirib.
ABŞ Prezidenti Donald Tramp İranın son raket hücumlarından sonra İsrailin Baş naziri Benjamin Netanyahuya təmkinli davranmaq çağırışı etmiş və cavab zərbələrinin daha genişmiqyaslı müharibəyə səbəb ola biləcəyi barədə xəbərdarlıq etmişdi.
Lakin məlumatlara görə, İsrail hökuməti əməliyyatı həyata keçirmək qərarından geri çəkilməyib. ABŞ Müdafiə Nazirliyi isə bu hücumlarda Amerika qüvvələrinin iştirak etmədiyini açıqlayıb.
Beynəlxalq KİV-in məlumatına görə, hücumlardan sonra Tehran, Təbriz, İsfahan və Karac şəhərlərində bir neçə partlayış baş verib. İran hakimiyyəti paytaxt ətrafında təhlükəsizlik tədbirlərini gücləndirib və bəzi bölgələrdə hava məkanına məhdudiyyətlər tətbiq edib.
Rəsmi Tehran hücumların nəticələri barədə ətraflı məlumat verməsə də, zərbə endirilən məntəqələrin hərbi obyektlər olduğu iddia edilir.
Məlumata görə, son qarşıdurmanın başlanmasına İranın İsrailə qarşı həyata keçirdiyi ballistik raket hücumları səbəb olub. İran tərəfi bunu Livandakı hadisələrə cavab kimi təqdim edərkən, İsrail ordusu raketlərin əksəriyyətinin zərərsizləşdirildiyini bildirib.
İsrail ordusu Yəməndən yeni raket və pilotsuz uçuş aparatlarının buraxıldığını da açıqlayıb. İranın dəstəklədiyi Husilərin daha əvvəl də Tel-Əviv və “Ben Gurion” hava limanı istiqamətində hücumlar təşkil etdiyi məlumdur.
Ekspertlər hesab edirlər ki, İsrail və İran arasında qarşılıqlı zərbələrin davam etməsi Yaxın Şərqdə daha genişmiqyaslı regional münaqişə riskini artırır. Qeyd edək ki, münaqişə ilə bağlı bəzi məlumatlar tərəflərin rəsmi açıqlamalarına əsaslanır və müstəqil mənbələr tərəfindən tam təsdiqlənməyə bilər.
