İsrailin müdafiə naziri Yisrael Katz ABŞ Prezidenti Donald Trampın hücumların dayandırılması çağırışına baxmayaraq, Qəzza zolağına hərbi əməliyyatların davam etdiriləcəyini açıqlayıb.
Çağdaş.Az xəbər verir ki, Katz bu barədə sosial şəbəkədə paylaşım edib.
O bildirib ki, İsrailin Qəzza siyasəti Baş nazir Benyamin Netanyahu tərəfindən müəyyənləşdirilib. Nazirin sözlərinə görə, bu siyasətin məqsədi “təhdidləri aradan qaldırmaq” və 7 oktyabr hadisələrində iştirak edən hər kəsdən qisas almaqdır.
Katz vurğulayıb ki, İsrail ordusu Qəzza zolağında hərbi əməliyyatları davam etdirəcək.
Bundan əvvəl ABŞ-ın “Fox News” telekanalına müsahibəsində Donald Tramp HƏMAS-la müxtəlif kanallar vasitəsilə əlaqə saxlandıqlarını bildirərək, qruplaşmanın silahı yerə qoyacağını iddia etmiş və İsraili Qəzzaya yeni hücumlar etməməyə çağırmışdı.
Lakin bu çağırışdan sonra İsrail ordusunun Qəzza şəhərində yerləşən kafeyə endirdiyi hava zərbəsi nəticəsində, yerli mənbələrin məlumatına görə, aralarında bir uşağın da olduğu azı 6 fələstinli həlak olub, 14-dən çox insan yaralanıb.
