Şimali Koreya paytaxt Pxenyan ətrafından Yaponiya dənizi istiqamətində təxminən 10 qısamənzilli ballistik raket buraxıb.
Çağdaş.Az xəbər verir ki, bu barədə Cənubi Koreya Silahlı Qüvvələrinin Baş Qərargah Rəisləri Komitəsinə istinadən News1 agentliyi məlumat yayıb.
Qeyd olunub ki, bundan əvvəl Cənubi Koreya ordusu Yaponiya dənizi istiqamətində naməlum uçuş aparatının buraxıldığını bildirmişdi. Sonradan onun qısamənzilli ballistik raketlər olduğu dəqiqləşdirilib.
Cənubi Koreya Baş Qərargahı əlavə raket buraxılışlarının mümkünlüyünü nəzərə alaraq yüksək hazırlıq vəziyyətinin saxlanıldığını açıqlayıb. Məlumata görə, Cənubi Koreya, ABŞ və Yaponiya raket buraxılışları ilə bağlı məlumat mübadiləsi aparır.
Hərbçilər raketlərin uçuş məsafəsi və digər texniki göstəricilərini təhlil etməyə davam edirlər.
Xatırladaq ki, Şimali Koreya sonuncu dəfə 12 avqust tarixində ballistik raket sınağı həyata keçirmişdi.
Bu arada, ABŞ Prezidenti Donald Trampın təşəbbüsü ilə ABŞ və Cənubi Koreya arasında keçirilən Ulchi Freedom Shield birgə hərbi təlimlərinin müddəti və miqyası azaldılıb və təlimlərin 21 avqusta qədər davam edəcəyi bildirilib.
Şimali Koreya lideri Kim Çen Inın bacısı Kim Yo Conq isə ABŞ-ın bu addımını əhəmiyyətsiz adlandıraraq, təlimlərin müddətinin və miqyasının azaldılmasının onların “təxribatçı və aqressiv mahiyyətini dəyişmədiyini” bəyan edib.
