Səudiyyə Ərəbistanının “Əl-Nəsr” klubunda çıxış edən portuqaliyalı futbolçu Kristiano Ronaldo karyerasında 1000 qol həddinə çatmadan futboldan ayrılmaq niyyətində olmadığını açıqlayıb.
Cagdas.az-ın xəbərinə görə, Dubayda keçirilən mükafatlandırma mərasimində çıxış edən 40 yaşlı Ronaldo bildirib ki, əsas məqsədi kuboklar qazanmaq və çoxlarının səbirsizliklə gözlədiyi 1000 qolluq göstəriciyə çatmaqdır. Onun sözlərinə görə, ciddi zədə ilə üzləşməzsə, bu hədəfə mütləq nail olacaq.
Motivasiyasının hələ də çox yüksək olduğunu deyən ulduz futbolçu qeyd edib ki, harada – Yaxın Şərqdə, yoxsa Avropada oynamasının fərqi yoxdur, o, futbolu sevir və oynamağa davam etmək istəyir.
Xatırladaq ki, 2022-ci ildə “Əl-Nəsr”ə transfer olunan Ronaldo şənbə günü 3:0 hesabı ilə qalib gəldikləri “Əl-Axdud”la oyunda iki qol vuraraq ümumi qol sayını 956-ya çatdırıb.
30 yaşından sonra 493 qol vuran Kristiano Ronaldo bununla da 64 il əvvəl “Arsenal”, “Fulhem” və “Kristal Pelas” klublarının heyətində çıxış edən sabiq ingilis futbolçu Ronni Rukun rekordunu da təkrarlayıb.
