Livan və İsrail nümayəndə heyətləri ABŞ ekspertlərinin hazırladığı təhlükəsizlik sahəsində niyyət memorandumu layihəsini Vaşinqtonda keçirilən danışıqlarda müzakirə edir.
Çağdaş.Az xəbər verir ki, bu barədə ABŞ Dövlət Departamentinin rəsmisi “Al Hadath” telekanalına açıqlamasında bildirib.
Mənbənin sözlərinə görə, tərəflər arasında fikir ayrılıqları qalmasına baxmayaraq, yaxın vaxtlarda başa çatması gözlənilən danışıqların beşinci raundundan sonra sənəd imzalana bilər.
ABŞ rəsmisi qeyd edib ki, xoşməramlı addım kimi İsrail ordusu hazırda nəzarətdə saxladığı Livanın cənubundakı müəyyən ərazilərdən geri çəkiləcək.
Onun sözlərinə görə, həmin ərazilərdə Livan ordusunun nəzarəti təmin etməsi üçün pilot təhlükəsizlik zonası yaradılacaq.
“İndiyədək İsrail qoşunlarının hansı konkret mövqelərdən çıxacağı dəqiqləşdirilməyib”, – deyə mənbə bildirib.
Məlumata əsasən, pilot layihə çərçivəsində Livan Silahlı Qüvvələri bölgədə təhlükəsizliyi təmin etmək, vəziyyəti nəzarətdə saxlamaq və Hizbullah üzvlərinin mümkün fəaliyyətinin qarşısını almaq qabiliyyətini nümayiş etdirməlidir.
Eyni zamanda memorandum layihəsinə əsasən, Hizbullah qüvvələrinin Litani çayının cənubundakı bütün mövqelərdən tam şəkildə geri çəkilməsi nəzərdə tutulur.
Sənədin imzalanacağı təqdirdə onun Livan-İsrail sərhədində təhlükəsizlik vəziyyətinin sabitləşdirilməsi istiqamətində növbəti addım olacağı gözlənilir.
