Milan Şkrinyar Fənərbaxçada keçirdiyi dövr barədə diqqətçəkən açıqlamalar verib.
Çağdaş.Az bildirir ki, Slovakiya millisinin düşərgəsində jurnalistlərin suallarını cavablandıran təcrübəli müdafiəçi sarı-lacivərdli klubdakı vəziyyəti “dəli və emosional yelləncək” sözləri ilə ifadə edib.
31 yaşlı futbolçu bildirib ki, Fənərbağçada qısa müddətdə çoxsaylı dəyişikliklərin şahidi olub.
“Fənərbağçada işlər hər zaman çılğın şəkildə gedir. Artıq bir il yarımdır buradayam və bu müddətdə üç prezident, üç baş məşqçi gördüm. Sanki emosional bir yelləncək kimidir”, – deyə Şkrinyar bildirib.
Slovak müdafiəçi İstanbul təmsilçisinin böyüklüyünü xüsusi vurğulayıb.
“Fənərbağça nəhəng klubdur. Super Liqanın səviyyəsi çox yüksəkdir. Avropanın ən yaxşı futbolçuları və məşqçiləri bura gəlir”, – deyə o qeyd edib.
Şkrinyar komandanın Çempionlar Liqası hədəfinə də toxunub:
“18 ildən sonra Çempionlar Liqasına qayıtmağı bacardıq. Bu möhtəşəm hadisədir və indi əsas mərhələni keçmək istəyirik”.
Komandadakı atmosferdən razı olduğunu bildirən futbolçu mövsümə istədikləri kimi başlamadıqlarını, lakin zirvəyə yaxınlaşdıqlarını deyib.
“Komandada atmosfer çox yaxşıdır. Liqaya istədiyimiz kimi başlamadıq, amma zirvəyə doğru irəliləyirik. Nə qədər çətin olsa da, çempion olmaq istəyirik”, – deyə Milan Şkrinyar vurğulayıb.
