Qalatasaray Super Kubokun yarımfinal oyunu ərəfəsində heyətini gücləndirir. Zədələrdən sağalan Uğurcan Çakır və Uilfrid Sinqo, eləcə də cəzası başa çatan Eren Elmalı yanvarın 5-də Trabzonsporla keçiriləcək matçda meydana çıxa biləcək. Baş məşqçi Okan Burukun hər üç futbolçuya şans verməsi gözlənilir.
Cagdas.az bildirir ki, sarı-qırmızılı komandada Super Kubok öncəsi texniki heyəti sevindirən müsbət yeniliklər yaşanır. Son həftələrdə zədə və cəza səbəbindən heyətdən kənarda qalan üç futbolçu Trabzonsporla qarşılaşma ilə yenidən komandaya qoşulmağa hazırlaşır.
Yanvarın 5-i bazar ertəsi Qaziantepdə keçiriləcək vacib görüş ərəfəsində Uğurcan Çakır və Uilfrid Sinqonun zədə prosesini tam başa vurduğu, Eren Elmalının isə cəzasını çəkdiyi bildirilir. Fiziki durumları müsbət qiymətləndirilən bu üç oyunçunun Super Kubok matçında forma geyinməsi planlaşdırılır.
Saat 20:30-da başlayacaq Trabzonsporla qarşılaşma Qalatasaray üçün həm kubok yolunda önəmli addım, həm də genişlənən heyət rotasiyası baxımından ciddi sınaq olacaq. Sarı-qırmızılılar demək olar ki, tam heyətlə meydana çıxaraq finala vəsiqə qazanmağı hədəfləyir.
