“Hazırda Türkiyədə təhsil alan azərbaycanlı tələbələrin sayı 45 minə yaxındır. Bu rəqəm həm bakalavr, həm magistratura, həm də doktorantura səviyyələrində təhsil alan tələbələri əhatə edir”.
Cagdas.az xəbər verir ki, bunu iqtisadçı Natiq Cəfərli deyib.
O bildirib ki, ümumilikdə Türkiyə Statistika Qurumunun (TÜİK) rəsmi məlumatlarına əsasən, Türkiyədə rəsmi yaşayış icazəsi ilə yaşayan Azərbaycan vətəndaşlarının sayı 71 min nəfərə yaxındır:
“Yay tətili başlayır, Türkiyə artıq ucuz ölkə deyil, bahalıqdır, tələbələrin 2 ay tətil zamanı Türkiyədə qalmaları baha başa gəlir, yay tətilində iş tapmayanlar vətənə dönmək, öz ailəsini görmək, heç olmasa, 2 ay xərclərini azaltmaq istəyirlər. Quru sərhədlərin bağlı qalması tələblər üçün əlavə yükdür, təyyarə biletləri çox bahadır, yayda təlabat artır deyə, qiymətlər də yüksəlir”.
N.Cəfərli qeyd edib ki, Naxçıvanda qeydiyyatda olanlar üçün Türkiyə ilə quru sərhədlər açıqdır:
“Təsəvvür edin ki, eyni universitetdə 2 azərbaycanlı oxuyur, biri, məsələn, Şəkidə, digəri isə Naxçıvanda qeydiyyatdadır. Naxçıvan qeydiyyatı olan tələbə cəmi 50-60 manat xərc çəkərək Türkiyənin müxtəlif şəhərlərindən evinə gələ bilir, amma şəkili, gəncəli, qubalı, bakılı gələ bilmir – bu ədalətli deyil. Quru sərhədlər tam açılmalıdır, heç olmasa Türkiyədə təhsil alan tələbələr üçün Naxçıvandan girişə icazə verilməli, onlar ucuz qiymətə vətənə dönməlidirlər”.
İqtisadçı əlavə edib ki, Naxçıvandan İran ərazisindən keçməklə avtobus marşrutu da var:
“Onlar cəmi 100-120 manata Bakıya gəlib çıxa bilərlər. Bəli, yol uzun, yorucu olur, amma tələbələr gəncdir, onlara vəsaitə qənaət etmək daha vacibdir. Nazirlər Kabinetinə çağırışım odur ki, lütfən, bu məsələyə baxın, bircə qərarla onminlərlə insanın problemini həll etmiş olarsınız”.(referans media)
