ABŞ dövlət katibi Marko Rubio Vaşinqtonun Kuba qarşısında tətbiq etdiyi birtərəfli sanksiyaları daha da gücləndirməyi planlaşdırdığını açıqlayıb.
Çağdaş.Az-ın xəbərinə görə, Rubio bildirib ki, yaxın günlərdə əlavə məhdudlaşdırıcı tədbirlər də gündəmdə olacaq:
“Dünən bu sanksiyaları müzakirə etmədik, amma onları tətbiq etdik və bundan sonra da yeni addımlar atacağıq”, – deyə o qeyd edib.
ABŞ mayın 7-də Kuba iqtisadiyyatının təxminən 40 faizinə nəzarət etdiyi iddia olunan “GAESA” qrupuna və onun rəhbərinə qarşı sanksiyalar tətbiq etmişdi. Bundan əlavə, Kanada şirkəti “Sherritt International” ilə Kuba dövlət şirkəti arasında fəaliyyət göstərən “MOA Nickel S.A.” birgə müəssisəsi də məhdudiyyətlərə məruz qalıb.
Bu addımlar ABŞ Prezidenti Donald Trampın mayın 1-də imzaladığı fərman əsasında həyata keçirilir. Həmin sənəd Kuba qarşı sanksiyaların daha da sərtləşdirilməsini nəzərdə tutur və onların üçüncü ölkələrə də təsir göstərə biləcəyi bildirilir.
Vaşinqton bu siyasəti Kuba hökumətinə siyasi və iqtisadi təzyiqin artırılması kimi əsaslandırır. Kuba tərəfi isə bu sanksiyaları sərt şəkildə tənqid edərək, onları “xalqı cəzalandıran addımlar” adlandırır.
