Kollektiv Təhlükəsizlik Müqaviləsi Təşkilatının (KTMT) Birgə Qərargahı və Müstəqil Dövlətlər Birliyinə (MDB) üzv ölkələrin sərhəd qoşunları xarici sərhədlərdə böhran vəziyyətləri zamanı qarşılıqlı fəaliyyətin təkmilləşdirilməsi məqsədilə birgə komanda-qərargah təlimi keçiriblər.
Çağdaş.Az xəbər verir ki, bu barədə KTMT-nin Birgə Qərargahının mətbuat xidməti TASS agentliyinə məlumat verib.
Məlumata görə, 17–19 avqust tarixlərində MDB Sərhəd Qoşunları Komandanları Şurasının Koordinasiya Xidmətinin sədri, general-polkovnik Aleksandr Manilovun dəvəti ilə KTMT Birgə Qərargahının nümayəndə heyəti, general-polkovnik Andrey Serdyukovun rəhbərliyi altında Rusiyanın Federal Təhlükəsizlik Xidmətinin (FSB) Sankt-Peterburq və Leninqrad vilayəti üzrə Sərhəd İdarəsində keçirilən beynəlxalq tədbirlərdə iştirak edib.
İşçi görüşlər zamanı iştirakçılar MDB ölkələrinin xarici sərhədlərinin mühafizəsinin təşkili sahəsində təcrübə mübadiləsi aparıb, həmçinin hərbi-texniki əməkdaşlığın prioritetləri və inkişaf perspektivlərini müzakirə ediblər.
KTMT-nin məlumatına əsasən, taktiki ssenarilərin tətbiq olunduğu təlimin əsas məqsədi MDB ölkələrinin sərhəd xidməti və digər aidiyyəti qurumları arasında xarici sərhədlərdə yarana biləcək böhran vəziyyətlərinin qarşısının alınması və aradan qaldırılması üzrə koordinasiyanı gücləndirmək olub.
Təlimlərin yekununda çıxış edən KTMT Birgə Qərargahının rəisi general-polkovnik Andrey Serdyukov bildirib ki, hazırkı beynəlxalq şəraitdə kollektiv təhlükəsizliyin təmin edilməsinin əhəmiyyəti daha da artır və bu, beynəlxalq təşkilatlarla sıx əməkdaşlığı zəruri edir.
Onun sözlərinə görə, birgə təlimlər praktiki məsələlərin həllində mühüm rol oynayır. Serdyukov əlavə edib ki, Sankt-Peterburqda keçirilən görüşlərdə KTMT Birgə Qərargahı ilə MDB Sərhəd Qoşunları Komandanları Şurası arasında gələcək əməkdaşlıq istiqamətləri də müzakirə olunub.
