Azərbaycanın dağ-mədən sənayesinin inkişafı, mövcud yataqların səmərəli istismarı və mineral resursların iqtisadi dövriyyəyə cəlb edilməsi məsələsi yenidən gündəmə gəlib. Sentyabrın 22-də Prezident İlham Əliyevin sədrliyi ilə dağ-mədən və metallurgiya sənayesinin inkişafına dair Dövlət Proqramına həsr olunmuş müşavirədə “Söyüdlü” yatağı da əsas perspektivli layihələr sırasında qeyd edilib. Müşavirədə yataqda 1,03 milyon unsiya qızıl resursunun müəyyən edildiyi və ilk istehsalın 2028-ci ildə nəzərdə tutulduğu bildirilib.
Cagdas.az-a danışan Milli Məclisin İqtisadi siyasət, sənaye və sahibkarlıq komitəsinin sədr müavini Azər Badamov bildirib ki, Söyüdlü yatağının böyük hissəsi Azərbaycan ərazisində yerləşir və işğal dövründə yatağın məhz bu hissəsi intensiv şəkildə istismar edilib:
“Söyüdlü (Zod) yatağı 1993-2020-ci illərdə Ermənistanın işğalı altında olub. Ermənistan bu yatağı texnoloji normalara riayət etmədən, köhnə üsullarla intensiv şəkildə istismar edərək talan edib. Yatağın təxminən 75 faizi Azərbaycan ərazisində yerləşsə də, işğalçılar filiz hasilatını məhz bizim ərazidə yerləşən hissədə, əsasən açıq karxana üsulu ilə həyata keçiriblər. Məlumatlara görə, Ermənistan Söyüdlü yatağından hər il təxminən 52 milyon dollar gəlir əldə edib”.
Deputat qeyd edib ki, Azərbaycanın torpaqlarını işğaldan azad etməsindən sonra Söyüdlü yatağı üzərində ölkəmizin nəzarəti bərpa olunub:
“2026-cı ilin sentyabrından etibarən AzerGold QSC tərəfindən yataqda qanuni istismar prosesinə başlanılıb. Hazırda yatağın qalıq ehtiyatlarının təxminən 1,03 milyon unsiya, yəni 32 tondan çox qızıl təşkil etdiyi qiymətləndirilir. AzerGold QSC tərəfindən yataqda müasir texnologiyalar tətbiq edilməklə, müvafiq texnoloji və ekoloji normalara riayət olunması əsasında hasilat həyata keçiriləcək”.
A.Badamovun sözlərinə görə, yatağın istismarından əldə olunan resurslar bundan sonra Azərbaycanın iqtisadi inkişafına və əhalinin rifahına xidmət edəcək:
“Təbii ki, bundan sonra Söyüdlü yatağının mineral xammal ehtiyatları Azərbaycan dövlətinin və xalqının rifahına, ölkəmizin iqtisadi inkişafına və dövlət büdcəsinə xidmət edəcək”.\modern.az\
