Türkiyə Xarici İşlər Nazirliyi Yunanıstan tərəfindən Egey və Aralıq dənizində yayımlanan bəzi xəritələrin hüquqi qüvvəsinin olmadığını bəyan edib.
Çağdaş.Az-ın xəbərinə görə, Nazirlikdən verilən açıqlamada bildirilib ki, Yunanıstan Balıqçılıq Nəzarət İdarəsinin rəsmi saytında yayımlanan xəritələrdə Yunanıstanın səlahiyyətinə daxil olmayan ərazilərdə balıqçılıq qadağaları tətbiq edilib və bu, beynəlxalq hüquqa ziddir.
Açıqlamada vurğulanıb ki, Türkiyə ilə Yunanıstan arasında mövcud olmayan “xəyali dəniz sərhədləri”ni əks etdirən bu xəritələr qəbuledilməzdir.
“Bu ərazilərdə Türkiyənin dəniz səlahiyyət zonalarını pozan xəritələrin heç bir hüquqi qüvvəsi yoxdur. Yunanıstanın 6 dəniz mili ərazi sularından kənarda, səlahiyyəti olmadığı sahələrdə və beynəlxalq sularda tətbiq etdiyi balıqçılıq məhdudiyyətləri də Türkiyə üçün yox hökmündədir”, – deyə açıqlamada qeyd olunub.
Nazirlik bildirib ki, Türkiyə öz balıqçılarının beynəlxalq hüquqa və tarixi hüquqlara əsaslanan fəaliyyətlərini qorumaqda davam edəcək və bu fəaliyyətlərə qarşı yönəlmiş heç bir “tək tərəfli və qeyri-qanuni” addımı qəbul etməyəcək.
Sonda iki ölkə arasında dialoqun əhəmiyyəti vurğulanaraq, Afina Bəyannaməsi çərçivəsində problemlərin beynəlxalq hüquq, ədalət və yaxşı qonşuluq prinsipləri əsasında həllinin vacibliyi qeyd olunub.
