Ukrayna prezidenti Vladimir Zelenski ABŞ və Ukrayna nümayəndə heyətləri arasında növbəti danışıqların həftənin sonuna doğru ABŞ-də baş tutacağını ehtimal edir.
“Cagdas.az” xəbər verir ki, Zelenskinin Novosti.Live “Telegram” kanalında yayımlanan audio açıqlamasında bildirdiyinə görə, hazırda tərəflər sənədlərin yekunlaşdırılması mərhələsindədir:
“Bu gün və ya sabah sənədlərimizi tamamlayacağıq. Daha sonra ABŞ yaxın günlərdə Rusiya tərəfi ilə məsləhətləşmələr aparacaq. Ardınca ABŞ nümayəndələri prezidentlə görüşəcək və bundan sonra nümayəndə heyətimizlə bir araya gələcək. Düşünürəm ki, danışıqlar aparan qruplarımız yaxın vaxtlarda, bəlkə də həftəsonu ABŞ-də görüşəcək”.
Zelenski əlavə edib ki, nümayəndə heyətləri arasında danışıqlardan sonra ABŞ prezidenti Donald Trampla görüşün keçirilməsi də nəzərdən keçiririləcək.
Xatırladaq ki, ABŞ və Ukrayna nümayəndə heyətləri arasında danışıqların ilk mərhələsi dekabrın 14-də Berlində baş tutub və təxminən beş saat davam edib. Tərəflər dialoqu dekabrın 16-da səhər saatlarında davam etdiriblər, həmin görüş isə iki saatdan artıq çəkib.
ABŞ nümayəndə heyətinə prezidentin xüsusi nümayəndəsi Stiv Uitkoff və Donald Trampın kürəkəni, sahibkar Cared Kuşner daxil olub. Ukrayna tərəfini isə prezident Vladimir Zelenski, Təhlükəsizlik Şurasının katibi Rustem Umerov və Baş Qərargah rəisi Andrey Qnatov təmsil edib.
Axios nəşrinin dekabrın 15-də ABŞ rəsmisinə istinadla yaydığı məlumata görə, danışıqların növbəti mərhələsi bu həftəsonu ABŞ-də — ehtimal ki, Floridanın Mayami şəhərində — işçi qrupları və hərbçilər səviyyəsində keçirilə bilər./TASS/
