İsrail Müdafiə Nazirliyi bildirib ki, Yəməndə fəaliyyət göstərən İranın dəstəklədiyi Husilər tərəfindən həyata keçirilən raket hücumu səbəbindən İsrailin bir çox bölgəsində hava hücumu siqnalları səsləndirilib.
Çağdaş.Az-ın məlumatına görə, hücumdan sonra əhaliyə sığınacaqlara getmək barədə xəbərdarlıq edilib. Təhlükənin aradan qalxmasından qısa müddət sonra isə təhlükəsizlik xəbərdarlığı ləğv olunub.
İsrail ordusu raketin hansı şəkildə zərərsizləşdirildiyi və ya hücumun maddi ziyana səbəb olub-olmadığı barədə ətraflı məlumat verməyib.
İsrailin təcili tibbi yardım xidməti Magen David Adom isə açıqlayıb ki, hücum zamanı sığınacağa qaçarkən yıxılan bir nəfər yüngül xəsarət alıb və ona hadisə yerində tibbi yardım göstərilib.
Hadisə, İsrailin İrandakı hərbi hədəflərə endirdiyi zərbələrdən sonra bölgədə gərginliyin davam etdiyi bir vaxta təsadüf edir. Hazırda hücumun nəticələri və əlavə təfərrüatlar barədə rəsmi məlumatların açıqlanması gözlənilir.
