Naxçıvan Muxtar Respublikasında işsizliklə bağlı rəsmi göstəricilər kəskin artım nümayiş etdirir. 2022-ci ildən bu yana bölgədə işsizlərin sayı 14 min nəfərdən çox artaraq rekord həddə çatıb. Müqayisə üçün qeyd edək ki, həmin dövrün rəsmi statistikasına əsasən, muxtar respublikada cəmi 190 nəfər işsiz kimi qeydiyyatda idi. Lakin yerli Dövlət Statistika Komitəsinin son açıqladığı məlumatlar vəziyyətin tamamilə dəyişdiyini, hazırda bu rəqəmin 14 min 500 nəfərə çatdığını ortaya qoyur.
Cagdas.az xəbər verir ki, statistikadakı bu kəskin sıçrayış müxtəlif iddialara yol açıb. Bəzi ekspertlər və müşahidəçilər hesab edirlər ki, əvvəlki yerli hakimiyyət dövründə işsizlik rəqəmləri reallığı əks etdirməyib və qəsdən aşağı göstərilib. Bununla belə, yerli sakinlər arasında fərqli fikirlər də mövcuddur; bir çox sakin Vasif Talıbovun vəzifəsindən gedişindən sonra bir sıra iş yerlərinin bağlandığını və məhz bu səbəbdən işsizliyin real olaraq artdığını bildirirlər. Baxmayaraq ki, hazırkı rəhbərlik yeni iş yerlərinin açılması istiqamətində addımlar atıldığını bəyan edir, Dövlət Statistika Komitəsinin yenilənmiş rəqəmləri bölgədəki məşğulluq probleminin hələ də kəskin və həlli vacib məsələ olaraq qaldığını təsdiqləyir./NOCOMMENT.AZ
