Ümumdünya Səhiyyə Təşkilatı (ÜST) Konqo Demokratik Respublikası (KDR) və Uqandada yayılan Ebola qızdırması epidemiyası səbəbindən beynəlxalq fövqəladə vəziyyət rejimi elan edib.
Çağdaş.Az xəbər verir ki, bu barədə bəyanat təşkilatın rəsmi saytında dərc olunub.
Vurğulanıb ki, söhbət pandemiyadan deyil, epidemiyadan gedir. Hazırda yoluxanların real sayı və xəstəliyin coğrafi yayılma miqyası ilə bağlı qeyri-müəyyənlik mövcuddur.
Mövcud məlumatlara görə, Konqo Respublikasının üç zonasında Ebola ilə bağlı olan 80 ölüm halı və 246 yoluxma hadisəsi qeydə alınıb. Yoluxma hallarından hələlik yalnız səkkizi laboratoriya üsulu ilə təsdiqlənib. Epidemiyanın episentri Konqonun İturi əyalətinin Monqbvalu və Rvampara rayonlarıdır.
“Konqo Demokratik Respublikası Ebola epidemiyaları ilə mübarizədə böyük təcrübəyə malikdir və ÜST hazırkı cavab tədbirləri çərçivəsində dəstəyini operativ şəkildə artırır. Milli hakimiyyət orqanları və tərəfdaşlarla sıx əməkdaşlıq edərək, virusun yayılmasını dayandırmaq, insanları qorumaq və onların həyatını xilas etmək üçün əlavə resurs və mütəxəssisləri sürətlə cəlb edirik”, – deyə ÜST-nin Afrika ölkələri üzrə Regional Bürosunun direktoru Mohamed Canabi bildirib.
Ebola virusu insanlara vəhşi heyvanlardan keçir. Xəstəliyin ilk simptomları qızdırma, əzələ, baş və boğaz ağrılarıdır. Daha sonra böyrək və qaraciyər funksiyaları pozulur, həmçinin daxili və xarici qanaxmalar başlaya bilir.
