Çikaqo Universitetinin professoru Con Mirşaymer Rusiya ilə Avropa arasında gələcəkdə silahlı qarşıdurma riskinin yüksək olduğu altı bölgənin adını açıqlayıb.
Cagdas.az xəbər verir ki, professor bu barədə amerikalı jurnalist Taker Karlsonun “YouTube” kanalında danışıb.
Mirşaymerin sözlərinə görə, potensial gərginlik ocaqları Belarus, Kalininqrad, Baltik dənizi, əriməkdə olan Arktika, Moldova və Qara dəniz regionlarıdır.
“Rusiya ilə bir tərəfdən, Avropa və Kiyevlə digər tərəfdən mümkün münaqişə məhz bu bölgələrdə baş verə bilər. Yaxın gələcəkdə Şərqi Avropa kifayət qədər təhlükəli məkan olacaq”,– deyə o bildirib.
Professor qeyd edib ki, Ukraynadakı münaqişə dayandırılsa və ya dondurulsa belə, Rusiya ilə Avropa arasındakı münasibətlər uzun müddət gərgin olaraq qalacaq.
Mirşaymer daha əvvəl də Avropa ölkələrinin Kiyevin Moskva ilə münaqişədə məğlubiyyət ehtimalını artıq qəbul etdiyini, lakin bunu açıq şəkildə etiraf etmədiyini bildirmişdi. Onun fikrincə, Ukrayna Silahlı Qüvvələri hazırda həm fərarilik, həm də itkilərin əvəzinin doldurulması ilə bağlı ciddi çətinliklərlə üzləşir.(sfera.az)
