Qloballaşma, müasir texnologiyalar və nəqliyyat sahəsində əldə olunan böyük nailiyyətlərə baxmayaraq, dünyada elə yerlər var ki, onları istəsəniz də, ziyarət edə bilməzsiniz.
Bu məkanlara giriş ya ciddi şəkildə qadağandır, ya da yalnız xüsusi icazəsi olan azsaylı insanlara verilir.
1. Vatikanın Gizli Arxivi
Təxminən 85 kilometr uzunluğunda rəfləri və 35 min cilddən çox sənədi özündə birləşdirən bu arxivdə bəşəriyyətin son 12 əsrlik tarixini əks etdirən nadir sənədlər saxlanılır. Burada uzun illər itmiş hesab edilən Tampliyer cəngavərlərinin məhkəmə protokolları, 1521-ci ildə Martin Lüterin kilsədən xaric edilməsi barədə Papalıq fərmanı və digər son dərəcə məxfi sənədlər mövcuddur. Arxiv həm də dünyanın ən böyük okkultizm ədəbiyyatı kolleksiyalarından biri hesab edilir. Buraya yalnız xüsusi akkreditasiyadan keçmiş azsaylı alimlər daxil ola bilir.
2. Keymada-Qrandi adası, Braziliya
San-Paulu sahillərindən təxminən 100 kilometr aralıda yerləşən bu ada ilk baxışda cənnəti xatırlatsa da, əslində dünyanın ən təhlükəli məkanlarından biridir. Ada ölümcül zəhərli ilanlarla doludur. Alimlərin hesablamalarına görə, hər kvadratmetrə bir neçə ilan düşür. Buradakı gürzələrin zəhəri dişlənən nahiyədə toxumaları sürətlə məhv edir və vaxtında tibbi yardım göstərilməzsə, qısa müddətdə insanın ölümünə səbəb ola bilər. Buna görə adaya giriş Braziliya hökuməti tərəfindən qadağan edilib.
3. “Zona 51”, ABŞ
Nevada ştatının cənubundakı səhrada yerləşən bu hərbi baza 1950-ci illərdə inşa olunub. Ərazi hasarlanmasa da, sərhədləri xəbərdaredici lövhələr və xüsusi nişanlarla qeyd edilib. “Zona 51” uzun illərdir sirli məkan kimi tanınır. Müxtəlif sui-qəsd nəzəriyyələrinə görə, burada yadplanetli texnologiyalar və ya məxfi hərbi silahlar sınaqdan keçirilir. Bu iddiaları təsdiqləyən dəqiq sübutlar olmasa da, bazaya giriş ciddi şəkildə məhdudlaşdırılıb.
4. Sürtsey adası, İslandiya
1963-cü ildə güclü vulkan püskürməsi nəticəsində yaranan Sürtsey Yer kürəsinin ən gənc adalarından biridir. Burada əvvəlcə bakteriyalar, göbələklər və kiflər meydana gəlib, daha sonra isə bitki və heyvan növlərinin sayı sürətlə artmağa başlayıb. Alimlər adada təbiətin sıfırdan necə formalaşdığını müşahidə etdikləri üçün ekosistemin pozulmaması məqsədilə bura yalnız elmi tədqiqat aparan şəxslərin girişinə icazə verilir.
5. Lasko mağaraları, Fransa
Lasko mağaralarının divarlarında eramızdan əvvəl XV-XVIII əsrlərə aid təxminən 600 qədim qayaüstü rəsm qorunub saxlanılır. Burada atlar, bizonlar, vəhşi öküzlər və müxtəlif heyvanlar təsvir olunub. 1963-cü ilə qədər mağara turistlər üçün açıq idi. Lakin alimlər müəyyən ediblər ki, ziyarətçilərin nəfəsindən ayrılan karbon qazı qədim rəsmlərə ciddi zərər verir. Buna görə mağara bağlanıb və hazırda yalnız xüsusi icazəsi olan mütəxəssislər ora daxil ola bilir.
6. Dünya Toxum Anbarı, Norveç
Norveçdə yerləşən bu məşhur toxum anbarı Yer üzündə bitki növlərinin gələcək nəsillər üçün qorunması məqsədilə yaradılıb. Nüvə müharibəsi, qlobal iqlim fəlakətləri və ya meteorit toqquşması kimi fövqəladə hallarda bitki müxtəlifliyini bərpa etmək üçün burada 4,5 milyona yaxın toxum nümunəsi saxlanılır. Anbar yerin 120 metr dərinliyində yerləşir və partlayışa davamlı təhlükəsizlik sistemi ilə qorunur. Bu səbəbdən adi insanların ora daxil olması mümkün deyil.//Lent.az
