Avropa İttifaqı (Aİ) Rusiyaya qarşı qəbul etdiyi 21-ci sanksiyalar paketi çərçivəsində 15 Çin şirkətini, eləcə də daha 11 xarici şirkəti sanksiyalar siyahısına daxil edib.
Çağdaş.Az xəbər verir ki, bu barədə Avropa İttifaqı Şurasının “Avropa İttifaqının Rəsmi Jurnalı”nda dərc olunan qərarda bildirilib.
Yeni sanksiyalar siyahısına Türkiyədən 3, Qırğızıstandan 3, Qazaxıstandan 2, Birləşmiş Ərəb Əmirliklərindən 2 və Hindistandan 1 şirkət daxil edilib.
Aİ həmin şirkətləri Rusiya iqtisadiyyatını və müdafiə sənayesini dəstəkləməkdə, həmçinin Moskvanın Avropa sanksiyalarından yayınmasına yardım etməkdə ittiham edir.
Yeni qərarla birlikdə Aİ-nin Rusiyaya qarşı sanksiya siyahısında olan fiziki və hüquqi şəxslərin ümumi sayı 3 100-ə çatıb ki, bu da indiyədək Avropa İttifaqının tətbiq etdiyi ən genişmiqyaslı sanksiya siyahısı hesab olunur.
