Google” Avropa İttifaqında böyük antiinhisar təzyiqi ilə üz-üzə qalıb.
Cagdas.az xarici mediaya istinadən xəbər verir ki, Aİ şirkətə yüz milyonlarla avro məbləğində cərimə tətbiq etməyə hazırlaşır. Məlumata əsasən, qərar artıq hazırlığın son mərhələsindədir və rəsmi açıqlamanın yay tətilindən əvvəl verilməsi gözlənilir. Bildirilir ki, bu, Avropa İttifaqı tərəfindən Rəqəmsal Bazarlar Qanunu çərçivəsində indiyə qədər tətbiq olunan ən böyük cərimə ola bilər. Araşdırma rəsmi olaraq 2025-ci ilin mart ayında başlanıb.
İstintaq zamanı “Google”un axtarış nəticələrinin sıralanması sistemi yoxlanılıb və şirkət öz xidmətlərini digər platformalardan üstün göstərməkdə ittiham olunub. Avropa Komissiyası hesab edir ki, bu yanaşma “DMA” qaydalarının pozulması anlamına gəlir. “Google” isə ittihamlarla bağlı narazılığını gizlətməyib. Şirkət nümayəndəsi bildirib ki, Avropa Birliyinin mövcud qaydalarına uyğunlaşmaq üçün axtarış sistemində edilən dəyişikliklər xidmət keyfiyyətinə ciddi mənfi təsir göstərib.
“DMA-nın tələblərinə uyğunlaşdırmaq üçün etdiyimiz dəyişikliklər məhsulun keyfiyyətinin tariximizdə ən ciddi şəkildə pisləşməsinə səbəb olub”,– deyə şirkət sözçüsü vurğulayıb.(sfera.az)
