“Fənərbaxça” 17 illik Çempionlar Liqası həsrətinə son qoymaq üçün Lyon qarşısında həlledici oyuna çıxmağa hazırlaşır. Kritik qarşılaşma öncəsi klub rəhbərliyi futbolçulara xüsusi motivasiya verib. Komandanın rəhbəri Aziz Yıldırım turun keçilməsi halında futbolçulara böyük məbləğdə mükafat veriləcəyini açıqlayıb.
Cagdas.az xəbər verir ki, Lyonla keçiriləcək cavab qarşılaşması öncəsi komanda ilə görüşən Aziz Yıldırım futbolçulara və texniki heyətə inandığını bildirib. Yıldırım turu keçəcəkləri təqdirdə rəhbərliyin komandanı mükafatlandıracağını vurğulayıb.
Məlumata görə, “Fənərbaxça” rəhbərliyi Lyonu mübarizədən kənarlaşdıracağı təqdirdə futbolçular arasında bölüşdürüləcək ümumi mükafat fondunu 2 milyon avrodan yuxarı qaldırmağı planlaşdırır.
“Fənərbaxça” üçün Lyon səddinin aşılması yalnız idman baxımından deyil, maliyyə baxımından da böyük əhəmiyyət daşıyır.
Komanda Çempionlar Liqasının əsas mərhələsinə vəsiqə qazansa, 18,62 milyon avro iştirak haqqı əldə edəcək. Play-off mərhələsinə qədər gələn 4,3 milyon avro da nəzərə alındıqda, klubun zəmanətli gəliri təxminən 22,92 milyon avroya çatacaq.
Komandanın əsas mərhələdəki nəticələri və yayım gəlirləri də əlavə olunduqda, “Fənərbaxça”nın ümumi qazancının 40 milyon avro civarına yüksələ biləcəyi hesablanır.
“Fənərbaxça” sonuncu dəfə 2008-2009 mövsümündə Çempionlar Liqasının əsas mərhələsində çıxış edib. Sarı-lacivərdlilər Lyonu mübarizədən kənarlaşdırsalar, 17 ildən sonra turnirin əsas mərhələsində iştirak hüququ qazanacaqlar.
İlk qarşılaşmada komandalar İstanbulda 1:1 hesablı heç-heçə edib. Bu səbəbdən Fransadakı cavab görüşü “Fənərbaxça”nın mövsümünün ən vacib oyunlarından biri olacaq.
Aziz Yıldırımın rəhbərliyi ilə “Fənərbaxça”nın tam heyətlə Lyona gedəcəyi və həlledici qarşılaşmanı tribunadan izləyəcəyi bildirilir.
Sarı-lacivərdlilər həm 17 illik həsrətə son qoymaq, həm də klubun kassasına milyonlarla avro qazandırmaq üçün meydana çıxacaq.\referans media\
