İsrail Şərqi Qüdsdə işğal siyasətini genişləndirmək istiqamətində növbəti addım atıb. İşğal altındakı Ümm Leysun məhəlləsində 450 mənzildən ibarət yeni qanunsuz yaşayış məntəqəsinin tikintisi planı təsdiqlənib.
Çağdaş.Az xəbər verir ki, bu barədə İsrailin “Ir Amim” insan haqları təşkilatı məlumat yayıb.
Bildirilib ki, Qüds Bələdiyyəsinin Rayon Planlaşdırma və Tikinti Komitəsi Fələstinlilərin yaşadığı Ümm Leysun məhəlləsində yeni qanunsuz yaşayış məntəqəsinin inşasını nəzərdə tutan layihəni təsdiqləyib.
Açıqlamada qeyd olunub ki, infrastruktur problemləri səbəbindən iki ildən artıq müddətə dayandırılan layihənin yenidən təsdiqlənməsi məhəllənin demoqrafik tərkibini dəyişdirməyə yönəlib.
Layihə Cəbəl əl-Mükəbbər və Sur Baher yaşayış məntəqələri arasında yerləşən, təxminən 800 fələstinli ailənin yaşadığı Ümm Leysun məhəlləsini əhatə edir. Plan çərçivəsində bölgəyə Fələstin torpaqlarını işğal etmiş təxminən 2 min israillinin yerləşdirilməsi nəzərdə tutulur.
“Ir Amim” təşkilatı vurğulayıb ki, bu qərar adi şəhərsalma layihəsi deyil, İsrail hökumətinin qanunsuz yaşayış məntəqələrinin genişləndirilməsinə yönəlmiş açıq siyasi seçimidir.
Xatırladaq ki, Beynəlxalq Ədalət Məhkəməsi 2024-cü il 19 iyul tarixli məsləhət xarakterli rəyində İsrailin Qəzza, Şərqi Qüds və İordan çayının qərb sahilində işğalçı dövlət olduğunu bildirib və üçüncü ölkələri bu işğala dəstək verməkdən çəkinməyə çağırıb.
Qeyd edək ki, İsrailin Təhlükəsizlik Kabineti iyulun 2-də də işğal altındakı Şərqi Qüdsdə 13 yeni qanunsuz yaşayış məntəqəsinin tikintisini nəzərdə tutan planı təsdiqləmişdi.
