Səhvən başqa şəxsin bank kartına pul göndərilməsi tez-tez rast gəlinən hallardandır. Bir anlıq diqqətsizlik və ya yanlış daxil edilən kart nömrəsi vətəndaşları çətin vəziyyətə sala bilər.
Bəs, belə hallarda göndərilən vəsaiti geri qaytarmaq mümkündürmü və qanun bu barədə nə deyir?
Cagdas.az xəbər verir ki, milli.az-ın məlumatına görə, Mülki Məcəllənin 1091-ci maddəsinə əsasən hüquqi əsas olmadan başqa şəxsin hesabına əmlak əldə etmək əsassız varlanma sayılır.
Belə ki, səhvən başqasının kart hesabına pul göndərildikdə, əvvəlcə öz kart məlumatlarınızın aid olduğu banka müraciət etməli, həmin bank da pul köçürülən kartın hansı banka aid olduğunu müəyyən edib, o banka müraciət etməlidir ki, səhv ödəniş həyata keçirilib. Bundan sonra da həmin bank öz müştərisinə bildirməlidir ki, sizin adınıza səhvən vəsait daxil olub. O, bu halda pulu öz istəyi ilə geri qaytara bilər.
Lakin pulun səhvən köçürüldüyü şəxs məbləği geri qaytarmadığı təqdirdə pulun geri qaytarılması üçün müraciət etdiyiniz bankdan imtina cavabı alıb, iddia ərizəsi ilə məhkəməyə müraciət edə bilərsiniz.
