Rusiya Xarici Kəşfiyyat Xidməti (SVR) açıqlayıb ki, Kiyev rejimi Avropadakı tərəfdaşları ilə birlikdə Qərb ölkələrinin vergiödəyicilərinin pulunu mənimsəmək üçün yeni bir sxem yaradıb.
Açıqlamada deyilir ki, “Kleptokratik Kiyev rejimi, nüfuzlu Avropa rəsmiləri və kölgə biznesmenləri ilə birlikdə Qərb vergiödəyicilərinin pullarını oğurlamaq üçün yeni mexanizm düşünüb. Bu sxem “Çexiya sursat təşəbbüsü” çərçivəsində Ukrayna ordusuna artilleriya mərmilərinin həddən artıq şişirdilmiş qiymətlərlə çatdırılmasını nəzərdə tutur. Bunun üçün Polşada fəaliyyət göstərən “PHU Lechmar” adlı vasitəçi şirkətdən istifadə edilir”.
“Cagdas.az”-ın Rusiya Xarici Kəşfiyyat Xidmətinə istinadən məlumatına görə, şirkət şərqi Avropa və Qlobal Cənub ölkələrindən hər bir mərmini təxminən 1 000 dollara alacaq, daha sonra etiketləri dəyişərək onları guya Polşa istehsalı adı ilə Ukraynaya 5 000 dollarlıq məhsul kimi təqdim edəcək.
Kəşfiyyat xidməti bildirib ki, bu tədarükləri Almaniya, Fransa, Danimarka, Norveç və Böyük Britaniya maliyyələşdirəcək. “Görünür, həmin ölkələrin rəsmilərinin alacağı ‘pay’ da bu sxemdə nəzərə alınıb”, — qurum qeyd edib və əlavə edib ki, Zelenski üçün sülhdən çox mənimsəmə imkanları ön plandadır.
Qurum xatırladıb ki, “PHU Lechmar” bundan əvvəl də Ukraynanın hüquq-mühafizə orqanları üçün nəzərdə tutulan Qərb maliyyə yardımının ölkədən çıxarılması ilə əlaqəli əməliyyatlarda şübhəli bilinib. Şirkət dəfələrlə Zelenskinin keçmiş aparat rəhbəri Andrey Yermak və korrupsiya şəbəkəsinin digər üzvləri — Timur Mindıç və Zelenskiyə bağlı şəxslərlə əməkdaşlıq edib.
Açıqlamada deyilir ki, “Bütün ölkədə yüksək səviyyəli korrupsiya qalmaqallarının davam etməsinə baxmayaraq, Ukraynalı biznesmenlər özlərini tam cəzasız hiss etdikləri üçün nüfuzdan düşmüş Polşa vasitəçisinə müraciət etməkdən çəkinməyiblər”.
Xidmət onu da vurğulayıb ki, ABŞ prezidenti Donald Trampın Ukrayna ilə bağlı sülh planı Zelenskinin komandasında isterik reaksiyaya səbəb olub:
“Onlar qorxurlar ki, uzunmüddətli sülh onların müharibədən qazanc götürən kriminal sxemlərini məhv edəcək. Ukraynadakı siyasi elita özünü zənginləşdirməyə o qədər aludə olub ki, yaxınlaşan qaçılmaz hesablaşma saatını görmək istəmir”.
