Rusiyanın xarici işlər naziri Sergey Lavrov ilə ABŞ dövlət katibi Marko Rubio arasında Filippinin paytaxtı Manilada keçirilən görüş başa çatıb.
Çağdaş.Az xəbər verir ki, görüş təxminən 37 dəqiqə davam edib. TASS-ın məlumatına görə, tərəflər yerli vaxtla saat 11:54-də başlayan danışıqları 12:31-də yekunlaşdırıblar.
Məlumata görə, görüşdə əsas diqqət Ukrayna münaqişəsinin nizamlanması məsələsinə yönəldilib. Sergey Lavrov bir gün əvvəl bildirmişdi ki, Moskva Vaşinqtonun Alyaskada irəli sürülmüş təkliflərdən hələ də imtina etmədiyini güman edir.
Diplomatik mənbənin sözlərinə görə, Lavrov-Rubio görüşünün keçirilməsi təşəbbüsü ABŞ tərəfdən gəlib.
Rusiya nümayəndə heyətinə xarici işlər nazirinin müavini Andrey Rudenko, Rusiya XİN-in Xarici Siyasətin Planlaşdırılması Departamentinin direktoru Aleksey Drobinin və Rusiyanın ASEAN yanında daimi nümayəndəsi Yevgeni Zaqaynov daxil olub.
ABŞ nümayəndə heyətində isə dövlət katibinin siyasi məsələlər üzrə müavini Allison Huker və ABŞ prezidentinin xüsusi nümayəndəsi Serxio Qor təmsil olunub.
