Livan Prezidenti Cozef Aun bildirib ki, İsraillə silahlı qarşıdurmanın dayandırılması üzrə danışıqlarda ölkəsi alçaldıcı heç bir razılaşmanı qəbul etməyəcək.
Çağdaş.Az xəbər verir ki, Aun eyni zamanda Hizbullah təşkilatını Livanı müharibəyə sürükləməkdə və ölkəyə xəyanət etməkdə ittiham edib.
Livan Prezident Administrasiyasının yaydığı məlumata görə, Aun ölkənin cənubundan gələn nümayəndə heyəti ilə görüşündə deyib:
“Biz xəyanət etmirik. Əsl xəyanət xarici maraqlar naminə ölkəni müharibəyə sürükləyənlərin etdiyidir.”
Prezident qeyd edib ki, danışıqlara başlamazdan əvvəl atəşkəsin təmin olunmasının vacibliyi ABŞ tərəfinə əvvəldən çatdırılıb. O xatırladıb ki, bu mövqe 14 və 23 aprel tarixlərində İsraillə səfirlər səviyyəsində keçirilən görüşlərdə də təkrar edilib.
Aun vurğulayıb ki, Livan dövlətinin rəsmi mövqeyi aydındır və istər Livanda, istərsə də Vaşinqtonda səslənən digər bəyanatlar ölkənin rəsmi siyasətini əks etdirmir.
Prezident hökumətin danışıqlara başlama qərarını tənqid edənlərə də cavab verərək bildirib ki, “milli konsensus yoxdur” arqumenti əsassızdır:
“Siz müharibəyə girməzdən əvvəl milli konsensus əldə etmişdinizmi?”
Aun əlavə edib ki, əsas məqsəd İsrail ilə müharibə vəziyyətinə son qoymaqdır, lakin bu, heç vaxt ölkənin ləyaqətini alçaldacaq şərtlərlə baş verməyəcək.
