Baş nazir postunu tutan Nikol Paşinyan görünür ki, qarşıdan gələn seçkilərdə hər səs uğrunda ciddi mübarizə aparmalı olduğunu anlayıb və onun reytinqinə mənfi təsir göstərə biləcək bütün “balastlar”dan qurtulmağa çalışır.
Cagdas.az-ın Ermənistan mətbuatına istinadən xəbərinə görə, hamıya məlumdur ki, onun həyat yoldaşı Anna Akopyanın antireytinqi rekord həddə çatıb. Hazırda Ermənistanda hətta Lsikan və Şmays kimi şəxslər belə Anna Akopyandan daha çox qəbul edilir. Məhz buna görə seçki ilindən əvvəl Anna Akopyan erməni ictimaiyyətinin gözündən uzaqlaşdırılaraq Çinə göndərilib. Onun nə qədər az görünməsi Paşinyan üçün bir o qədər sərfəlidir.
Anna Akopyanın ictimai obrazını çox vaxt onun qardaşı, deputat Hraçya Akopyan mediada tez-tez görünməklə “yeniləyirdi”. Paşinyan bu məsələni də həll etməyə qərar verib və Hraçya Akopyanı seçki (PFP) siyahısına daxil etməyəcək. Bu barədə məlumatı Hraçya Akopyan dünən jurnalistlərə özü verib.
Görünür, Nikol Paşinyan seçkilər ərəfəsində Anna Akopyanla “ayrılmaq” qərarına gəlib və onunla bağlı neqativ təəssürat yaradan hər şeyi ictimaiyyətdən uzaqlaşdırmağa çalışır.
