Bakıda piyadalar üçün nəzərdə tutulan pilləkən bəzi sürücülərə gözlənilməz maneə yaradır. Nəticədə avtomobillər pilləkəndən aşağı düşərək qəzaya uğrayır.
Cagdas.az Xəzər TV-yə istinadən bildirir ki, sürücülər üçün təhlükə mənbəyinə çevrilən ərazi paytaxtın Yasamal rayonu, Kamal Rəhimov küçəsindədir.
Çoxbərtəbəli binanın qarşısındakı yolun sonunda piyadalar üçün pilləkən var. Sakinlər deyirlər ki, ay ərzində ən azı 5-10 avtomobil sürücüsü həmin pilləkəni görməyib hərəkətlərini davam etdirirlər ki, nəticədə aşağı düşürlər.
Sakinlər onu da əlavə etdilər ki, qəzaların baş verməsinə ən çox səbəb bu hissədə olan pilləkənlərin aydın görünməməsidir. Xüsusən ərazidən tez-tez istifadə etməyən sürücülər küçənin sonunda pilləkən olduğunu bilmirlər.
Onlar belə hadisələrin qarşısının alınması üçün aidiyyəti qurumlardan pilləkənin yaxınlığında önləyici tədbirlərin görülməsini təklif edirlər.
Məsələ ilə bağlı Yasamal Rayon İcra Hakimiyyətindən bildirildi ki, həmin yerə baxılıb və təhlükəni aradan qaldırmaq məqsədi ilə əraziyə dirəklər basdırılacaq.
Daha ətraflı videomaterialı təqdim edirik.(musavat.com)
