Milli Məclisin sabiq sədri, hazırda ABŞ-də yaşayan Rəsul Quliyevin fəxri sədri olduğu Gələcək Azərbaycan Partiyasının (GAP) fəaliyyətini dayandıraraq üzvlərinin Yeni Azərbaycan Partiyasına (YAP) birləşmək üçün müraciət etməsi ilə bağlı məlumatlar var.
Cagdas.az bildiriri ki Milli Məclisin deputatı, Yeni Azərbaycan Partiyası (YAP) İdarə Heyətinin üzvü Azər Badamov Modern.az-a açıqlamasında onlara belə bir rəsmi müraciətin daxil olmadığını, gələcəkdə belə bir addım atılarsa, rəhbər orqanlar tərəfindən siyasi və hüquqi aspektlər nəzərə alınmaqla qərar qəbul oluna biləcəyini bildirib:
“Yeni Azərbaycan Partiyası regionun ən perspektivli siyasi təşkilatıdır. Kimlərincə öz fəaliyyətlərini bizim partiyada görməsi çox normaldır. Partiyamızın siyasi fəaliyyət tarixində müxtəlif siyasi təşkilatların bizə qoşulması və vahid siyasi platformada birləşməsi ilə bağlı zəngin təcrübə formalaşıb. Məlum olduğu kimi, müxtəlif dövrlərdə Azərbaycan Xalq Demokratik Partiyası, Azərbaycan Kəndli Partiyası, Milli Qurtuluş Partiyası, Azərbaycan Yurddaş Partiyası, Azərbaycan Milli Hərəkat Partiyası və Azərbaycan Demokratik Sahibkarlar Partiyası kimi siyasi təşkilatlar fəaliyyətlərini dayandıraraq Yeni Azərbaycan Partiyasına qoşulmaq barədə qərar qəbul ediblər. Bu addımlar həmin partiyaların ölkənin aparıcı siyasi qüvvəsi ətrafında birləşmək, dövlətçilik maraqlarına xidmət etmək və Azərbaycanın inkişaf strategiyasına dəstək vermək niyyətindən irəli gəlirdi”.
Azər Badamov Gələcək Azərbaycan Partiyasından YAP-a birləşmək istəyi ilə bağlı partiyanın İdarə Heyətinə hər hansı rəsmi müraciət etmədiyini bildirib.
“Təbii ki, gələcəkdə belə bir müraciət təqdim olunarsa, məsələ partiyanın rəhbər orqanlarında geniş şəkildə müzakirə edilərək siyasi və hüquqi aspektlər nəzərə alınmaqla müvafiq qərar qəbul oluna bilər. Ümumilikdə, Azərbaycanda sağlam siyasi münasibətlərin formalaşması, milli maraqlar ətrafında həmrəyliyin gücləndirilməsi və dövlətçilik ənənələrinin qorunması baxımından siyasi qüvvələrin konstruktiv əməkdaşlığı xüsusi əhəmiyyət daşıyır. Bu mənada, ölkənin aparıcı siyasi qüvvəsi olan Yeni Azərbaycan Partiyasına birləşmək istəyən siyasi təşkilatların təşəbbüsləri demokratik siyasi proseslərin tərkib hissəsi kimi qiymətləndirilə bilər”.
Rəsul Quliyevin Azərbaycandakı təmsilçisi, Gələcək Azərbaycan Partiyasının sədri Ağasif Şakiroğlu da birləşəmk barədə xəbəri təkzib edib. Ancaq Rəsul Quliyevin son sosial media paylaşımları birləşmək barədə iddiaları inandırıcı edir.
