ABŞ Prezidenti Donald Tramp NATO-nun 36-cı Dövlət və Hökumət Başçıları Zirvəsində iştirak etmək üçün 17 ildən sonra Türkiyəyə rəsmi səfər edəcək. Səfər çərçivəsində Prezident Rəcəb Tayyib Ərdoğanla keçiriləcək görüşdə müdafiə sənayesi, ticarət, enerji əməkdaşlığı və regional təhlükəsizlik məsələlərinin müzakirəsi gözlənilir.
Çağdaş.Az xəbər verir ki, iyulun 7-8-də Ankarada keçiriləcək NATO Zirvəsində Alyansa üzv 32 ölkənin liderləri, xarici işlər və müdafiə nazirləri bir araya gələcək. Sammitdə Avstraliya, Yaponiya, Yeni Zelandiya və Cənubi Koreya da iştirak edəcək.
Donald Trampın Türkiyəyə son ABŞ prezident səfərindən 17 il sonra gələcəyi bildirilir. Bundan əvvəl ABŞ prezidenti qismində Ankaraya son rəsmi səfəri 2009-cu ildə Barak Obama etmişdi.
Məlumata görə, Prezident Kompleksində keçiriləcək görüşdə Ərdoğan və Tramp əvvəlcə təkbətək, daha sonra isə nümayəndə heyətlərinin iştirakı ilə danışıqlar aparacaqlar.
Görüşün əsas gündəm mövzularından biri müdafiə sənayesi olacaq. Tərəflərin CAATSA sanksiyalarının ləğvi, Türkiyənin F-35 proqramına qayıtması, KAAN döyüş təyyarəsi üçün mühərrik tədarükü və yeni hərbi layihələri müzakirə edəcəyi gözlənilir.
Danışıqlarda iki ölkə arasında ticarət dövriyyəsinin 100 milyard dollara çatdırılması hədəfi və enerji sahəsində yeni əməkdaşlıq layihələri də nəzərdən keçiriləcək.
Liderlər həmçinin Suriyanın yenidən qurulması, terrorla mübarizə, Rusiya-Ukrayna müharibəsi, Qəzzadakı vəziyyət və bölgədə atəşkəsin təmin olunması kimi regional məsələləri də müzakirə edəcəklər.
Bundan əlavə, ABŞ-də yaşayan FETÖ rəhbərlərinin fəaliyyəti və Türkiyənin onların ekstradisiyası ilə bağlı tələblərinin də görüşün gündəmində yer alacağı bildirilir./Referans Media/
