İranın dondurulmuş 6 milyard dollar vəsaiti Tehrana qaytarılacaq.
Cagdas.az xəbər verir ki, bunu İran prezidenti Məsud Pezeşkian bildirib.
Prezident bazar ertəsi açıqlayıb ki, İranın dondurulmuş 6 milyard dollar həcmində aktivləri azad edilərək Qətər vasitəsilə ölkəyə qaytarılacaq. O, həmçinin bildirib ki, sülh sazişi çərçivəsində neft və neft-kimya sektoruna qarşı tətbiq olunan sanksiyalar aradan qaldırılıb. Pezeşkian bunu İran xalqı üçün “böyük qələbə” adlandırıb.
Qum şəhərinə səfəri zamanı ayətullah Şübeyri Zəncani ilə görüşdə çıxış edən prezident qeyd edib ki, azad ediləcək 6 milyard dollar Qətərdə saxlanılan ümumilikdə 12 milyard dollarlıq İran vəsaitinin bir hissəsidir. Qalan məbləğin də geri qaytarılması istiqamətində iş aparılır. Bu vəsaitlərin azad olunması və sanksiyaların ləğvi İsveçrədə keçirilən danışıqlar və İslamabad Memorandumu çərçivəsində əldə edilmiş razılaşmanın tərkib hissəsi olub.
Pezeşkian müharibə dövründə İran xalqının nümayiş etdirdiyi dözümlülüyü yüksək qiymətləndirib. O bildirib ki, rəhbərin, nazirlərin, komandirlərin, ziyalıların və hətta məktəblilərin qətlə yetirilməsinə baxmayaraq, xalq, silahlı qüvvələr və hökumət ölkəni qorumaq üçün birlik nümayiş etdiriblər. Onun sözlərinə görə, ABŞ və İsrail İranı sabitsizləşdirmək üçün bütün imkanlarını səfərbər etmiş, iqtisadi təzyiqlərin ölkənin çökməsinə səbəb olacağını düşünmüşdülər, lakin xalqın müqaviməti və ilahi dəstək bu planları puça çıxarıb.
Prezident bir daha vurğulayıb ki, İran nüvə silahı əldə etmək niyyətində deyil. O qeyd edib ki, bu mövqe mərhum ali rəhbər Əli Xamenei tərəfindən də açıq şəkildə ifadə olunmuşdu və hələ də qüvvədədir.
Pezeşkian həmçinin bildirib ki, hökumət artıq müharibədən sonrakı bərpa işlərinin planlaşdırılmasına başlayıb və əhalinin dəstəklənməsi məqsədilə bir sıra tədbirlər həyata keçirir.(Modern.az)
