Almaniya kansleri Otto Fon Bismarkın nəvəsi Aleksandr Fon Bismark Avropa ilə Rusiya arasında müharibənin baş verməyəcəyini düşündüyünü, lakin Moskvaya qarşı təhdid dilinin təhlükəli olduğunu bildirib.
Çağdaş.Az bildirir ki, Rus-Alman ictimai layihəsi olan “Bismark Dialoqu”nun təsisçisi TASS agentliyinə müsahibəsində bu barədə danışıb.
“Belə bir müharibə baş verməyəcək”, – deyə Aleksandr fon Bismark bildirib.
O vurğulayıb ki, son dövrlərdə siyasi ritorika getdikcə daha aqressiv xarakter alır.
“Sanki istifadə olunan dil silahlandırılır. Siyasi liderlər düşünürlər ki, Rusiyanı hədələməklə onu geri çəkilməyə məcbur edə bilərlər. Ancaq onlar rusların düşüncə tərzini başa düşmürlər, çünki Rusiya məğlub ola bilməz”, – deyə o qeyd edib.
Aleksandr fon Bismarkın sözlərinə görə, bu cür ritorika nüvə qarşıdurması riskini artırır.
“Nüvə müharibəsi təhlükəsi kifayət qədər ciddi səviyyəyə çata bilər. Bu isə heç birimizin istəmədiyi ssenaridir”, – deyə o bildirib.
O əlavə edib ki, Almaniyada bəzi siyasi qüvvələr Rusiya ilə gərginliyin daha da artmasının əleyhinədir.
Bu sırada BSW və Almaniya üçün Alternativ partiyalarının adını çəkən Aleksandr fon Bismark bildirib ki, həmin siyasi qüvvələr belə qarşıdurmanın davam etməsini istəmirlər.
Onun sözlərinə görə, əsas siyasi axını təmsil edən bəzi qüvvələr isə “Rusiyanı diz çökdürmək lazımdır” mövqeyini müdafiə edirlər.
“Ancaq adi insanlar artıq buna inanmırlar”, – deyə Aleksandr fon Bismark vurğulayıb.
