İsrailin Şərqi Aralıq dənizi, Balkanlar və Qara dəniz bölgəsində hava hücumundan müdafiə və radar şəbəkəsini genişləndirdiyi iddia olunur. Məlumata görə, İsrail artıq Cənubi Kipr, Yunanıstan və Rumıniyada raket sistemləri yerləşdirib, indi isə Bolqarıstan, Albaniya, Serbiya, Macarıstan və Moldova ilə də əməkdaşlıq imkanlarını müzakirə edir.
Çağdaş.Az xəbər verir ki, Türkiyə mətbuatında yer alan iddialara əsasən, məqsəd bölgədə radar və raketdən müdafiə sistemlərini vahid idarəetmə mərkəzindən koordinasiya etməkdir. Təqaüddə olan türkiyəli hərbi ekspert İbrahim Keleş bildirib ki, İsraildə “Türkiyə bizi mühasirəyə alır” düşüncəsi güclənib və bu səbəbdən ölkə regional təhlükəsizlik strategiyasını genişləndirir.
Digər hərbi ekspert, istefada olan general Mehmet Okkan isə Türkiyənin bu ssenarini illər əvvəl proqnozlaşdırdığını qeyd edib. Onun sözlərinə görə, Ankara buna cavab olaraq “Polad Qübbə” layihəsi çərçivəsində HİSAR, SİPER, GÖKBERK, SUNGUR və GÜRZ kimi hava hücumundan müdafiə sistemlərinin inkişafına üstünlük verir.
Okkan əlavə edib ki, Türkiyənin Liviya, Somali, Kosovo, Bosniya və Herseqovina, eləcə də Körfəz ölkələri ilə müdafiə sahəsində əməkdaşlığı da bu strategiyanın tərkib hissəsidir. Onun fikrincə, ölkənin çəkindirici hərbi gücünü artırmaq üçün ballistik raket, pilotsuz uçuş aparatları və hava hücumundan müdafiə layihələrinə investisiyalar davam etdirilməlidir.
Qeyd edək ki, xəbərdə yer alan məlumatlar və qiymətləndirmələr Türkiyə mətbuatında dərc olunan iddialara və hərbi ekspertlərin fikirlərinə əsaslanır. Bu iddialarla bağlı müstəqil təsdiq təqdim olunmayıb./Referans Media/
