Arıqlama məqsədilə istifadə olunan “GLP-1” qrupuna aid preparatlar, o cümlədən “Ozempic”, 2-ci tip diabet xəstələrində ciddi sümük sınıqları riskini azalda bilər.
Cagdas.az xəbər verir ki, bu barədə aparılan yeni araşdırmanın nəticələri indiyədək sürətli arıqlamanın sümük sağlamlığına mənfi təsir göstərdiyi ilə bağlı fikirləri şübhə altına alıb.
Tədqiqat zamanı müəyyən edilib ki, “GLP-1” preparatları qəbul etməyə başlayan 2-ci tip diabet xəstələrində üç il ərzində sümük kövrəkliyi ilə əlaqəli sınıqların riski “DPP-4” qrupuna aid diabet dərmanlarından istifadə edənlərlə müqayisədə 21 faiz daha aşağı olub.
Alimlər ABŞ-də 2015–2022-ci illər arasında yaşı 50–90 arasında olan 133 mindən çox 2-ci tip diabet xəstəsinin tibbi məlumatlarını təhlil ediblər. Nəticələr göstərib ki, “GLP-1” preparatlarından istifadə edənlərdə onurğa sınıqları 32 faiz, bud sümüyü və omba nahiyəsindəki sınıqlar isə 30 faiz azalıb.
Araşdırmaya görə, bu müsbət təsir bədən çəkisinin azalması və ya qanda şəkərin səviyyəsinin yaxşılaşmasından asılı olmayıb. Bu isə preparatların sümük toxumasına birbaşa təsir göstərə biləcəyi ehtimalını artırır.
Bununla belə, tədqiqat müəllifləri ehtiyatlı olmağa çağırıblar. Onların sözlərinə görə, araşdırma müşahidə xarakteri daşıdığı üçün əldə edilən nəticələr preparatların sümükləri birbaşa qoruduğunu qəti şəkildə sübut etmir. Fiziki aktivlik, əzələ gücü və sümük sağlamlığının əvvəlki vəziyyəti kimi digər amillər də nəticələrə təsir etmiş ola bilər.
Araşdırma həmçinin göstərib ki, 2-ci tip diabeti olmayan, yalnız arıqlamaq məqsədilə “GLP-1” preparatlarından istifadə edən şəxslərdə sınıq riskinin azalması müşahidə edilməyib.
Tədqiqat müəllifləri bildiriblər ki, bu nəticələrin təsdiqlənməsi və preparatların sümük sağlamlığına həqiqi təsirinin müəyyənləşdirilməsi üçün gələcəkdə genişmiqyaslı klinik sınaqların aparılmasına ehtiyac var.((sfera.az)
