Yeni dərs ilinin başlamasına az vaxt qalıb. Bu dövrdə bəzi uşaqlar məktəbə qayıtmaq istəmir, səhərlər oyanmaqda çətinlik çəkir və dərsə getməklə bağlı narahatlıq yaşayırlar.
Cagdas.az xəbər verir ki, mütəxəssislər bunun valideynlərin düşündüyündən daha geniş yayılan problem olduğunu bildirirlər.
Məktəbdən yayınma halları müxtəlif səbəblərlə bağlı ola bilər. Yay tətilində uşaqların ekran qarşısında daha çox vaxt keçirməsi isə məktəb rejiminə qayıdışı çətinləşdirən amillərdən biri kimi göstərilir.
Məktəbə getmək istəməmək sadəcə “ərköyünlük” olmaya bilər
Bildirilir ki, məktəbdən yayınma problemi yaşayan uşaqların davranışını yalnız tənbəllik və ya intizamsızlıqla izah etmək düzgün deyil.
Mütəxəssislərin fikrincə, uşağın məktəbə getmək istəməməsinin arxasında narahatlıq, məktəb mühitində özünü rahat hiss etməməsi, müəllim və ya sinif yoldaşları ilə münasibətlərdə problem, öyrənmə çətinlikləri və digər səbəblər dayana bilər.
Bu səbəbdən valideynlərin ilk addımı uşağa qışqırmaq və onu məcbur etmək deyil, problemin səbəbini anlamağa çalışmaq olmalıdır.
“Uşağa qışqırmayın”
Məktəbdən yayınma üzrə mütəxəssis Ceyni Demskinin sözlərinə görə, uşaq səhər məktəbə getmək üçün yataqdan qalmaq istəmədikdə valideynlər ona qışqırmamalıdır. Onun fikrincə, uşağa vəziyyətinin başa düşüldüyünü hiss etdirmək və narahatlığının öhdəsindən gələ biləcəyinə inam yaratmaq vacibdir.
Məktəbdən gələn davamiyyətlə bağlı xəbərdarlıqlar zamanı uşağa əlavə təzyiq göstərmək də vəziyyəti ağırlaşdıra bilər. Bunun əvəzinə valideynlərin məktəb rəhbərliyi və müəllimlərlə
görüşərək problemin səbəblərini və mümkün həll yollarını müzakirə etməsi tövsiyə
olunur.
Uşağın məktəbdə dostları və müəllimləri ilə münasibəti vacibdir
Mütəxəssislər uşağın məktəbdə müəllimləri, sinif yoldaşları və digər böyüklərlə sağlam münasibətlər qurmasının məktəbə bağlılığını artırdığını bildirirlər. Valideynlər uşağın müəllimi
və məktəb psixoloqu ilə əlaqə saxlayaraq onun məktəbdəki vəziyyəti barədə məlumat
ala bilərlər. Dərsdənkənar fəaliyyətlər və dostlarla birlikdə keçirilən vaxt da
uşağın məktəblə sosial əlaqələrini gücləndirə bilər.(referans media)
