Rusiyanın Ermənistan məhsullarına tətbiq etdiyi ixrac məhdudiyyətlərinin iqtisadi təsirləri əsasən 2026-cı ilin ikinci yarısında özünü göstərəcək.
Çağdaş.Az xəbər verir ki, bunu Ali İqtisadiyyat Məktəbinin (HSE University) İqtisad Elmləri fakültəsinin dosenti Anna Fedyunina TASS agentliyinə açıqlamasında deyib.
Onun sözlərinə görə, məhdudiyyətlər xüsusilə mövsümi ixracın əsas hissəsini təşkil edən giləmeyvə, tərəvəz və meyvə tədarüklərinə ciddi təsir göstərəcək.
Fedyunina bildirib ki, məhdudiyyətlər 2026-cı ilin may ayının sonundan başlayaraq iyun ayı ərzində mərhələli şəkildə tətbiq edilib. Qadağalar əvvəlcə pomidor, xiyar, bibər, göyərti və çiyələyi, daha sonra isə çəyirdəkli meyvələr, üzüm, kartof, quru meyvələr, bəzi balıq məhsulları, spirtli içkilər və mineral suları əhatə edib.
Ekspert qeyd edib ki, buna baxmayaraq, 2026-cı ilin ilk beş ayında sonradan məhdudiyyət tətbiq olunan məhsulların Rusiyaya ixracı əvvəlki ilin eyni dövrü ilə müqayisədə artıb. Onun fikrincə, bu vəziyyət ixracatçıların məhdudiyyətlər qüvvəyə minməzdən əvvəl məhsulları əvvəlcədən göndərməsi ilə əlaqədar ola bilər.
HSE Universitetinin Struktur Siyasəti Araşdırmaları Mərkəzinin BMT-nin UN Comtrade məlumatları əsasında apardığı hesablamalara görə, Ermənistanın ümumi ixracı 2026-cı ilin yanvar–may aylarında 2,86 milyard dollar təşkil edib ki, bu da ötən ilin eyni dövrü ilə müqayisədə 3,7 faiz azdır.
May ayında isə illik azalma 11,6 faizə çatıb. Fedyunina hesab edir ki, hazırkı göstəricilər daha çox 2025-ci ildə baş vermiş kəskin azalmanın ardından ixracın sabitləşməsini göstərir, yeni dərin tənəzzülü deyil.
Onun təqdim etdiyi hesablamalara əsasən, Ermənistanın Rusiyaya ixracı:
2024-cü ilin ilk beş ayında – 1,1776 milyard dollar,
2025-ci ilin ilk beş ayında – 1,0783 milyard dollar,
2026-cı ilin ilk beş ayında isə 1,0288 milyard dollar olub.
Beləliklə, 2026-cı ildə Rusiyaya ixrac 2025-ci illə müqayisədə 4,6 faiz, 2024-cü illə müqayisədə isə 12,6 faiz azalıb.
