Rusiyanın paytaxtı Moskva və ətrafına pilotsuz uçuş aparatları (PUA) ilə həyata keçirilən son hücum cəhdi son iki ildə qeydə alınan ən genişmiqyaslı hücum olub.
Çağdaş.Az xəbər verir ki, bu nəticə Moskva meri Sergey Sobyaninin açıqladığı məlumatlar əsasında aparılan hesablamalara əsaslanır.
Sobyaninin sözlərinə görə, bazar ertəsi axşamından çərşənbə axşamı Moskva vaxtı ilə saat 05:00-dək Moskva və Moskva vilayəti istiqamətində ümumilikdə 620 PUA uçub. Onlardan 180-i paytaxt regionunda hava hücumundan müdafiə sistemləri tərəfindən məhv edilib.
“PUA qalıqlarının düşdüyü ərazilərdə fövqəladə xidmətlər işləyir”, – deyə Sobyanin bildirib.
Bundan əvvəl ən böyük PUA hücumu avqustun 15-i axşamından avqustun 16-sı saat 06:30-dək qeydə alınmışdı. Həmin vaxt Moskva istiqamətində 600 pilotsuz aparat uçmuş, onların 201-i Moskva vilayətində vurulmuşdu.
Moskva meri daha əvvəl də bildirmişdi ki:
6–7 iyul tarixlərində hava hücumundan müdafiə qüvvələri 430-dan çox PUA-nı, o cümlədən Moskvaya yaxınlaşan 36 aparatı məhv edib;
19–20 iyul tarixlərində Moskva istiqamətində 400-dən çox PUA qeydə alınıb, onlardan 85-i paytaxta yaxınlaşarkən vurulub;
27–28 iyul tarixlərində Moskva vilayətinə 390-dan çox, 17–18 iyul tarixlərində isə 370-dən çox PUA yönəlib;
11–12 iyul tarixlərində 300-dən çox, o cümlədən Moskvaya yaxınlaşan 45 PUA məhv edilib;
4 iyul tarixində isə paytaxt istiqamətində 200-dən çox pilotsuz aparat uçub.
Sobyaninin məlumatına görə, indiyədək ən kütləvi PUA hücumu 11 mart 2025-ci ildə baş verib. Həmin vaxt Moskva istiqamətində yaxınlaşan 74 PUA, ümumilikdə isə müxtəlif müdafiə xətlərində yüzlərlə döyüş pilotsuz aparatı zərərsizləşdirilmişdi.
