Kreml Estoniyanın müdafiə müəssisələrindən birində baş verdiyi iddia olunan təxribat hadisəsinə görə Rusiya ilə sərhədi bağlamaq qərarını tənqid edib.
Çağdaş.Az xəbər verir ki, Rusiya Prezidentinin mətbuat katibi Dmitri Peskov bildirib ki, Estoniya bu addımı ilə “divar tikir” və tarixin göstərdiyi kimi, belə siyasət həmin ölkələr üçün müsbət nəticə vermir.
“Estoniya divar tikir. Tarix göstərir ki, bir çox ölkə divarlar inşa edib və bu divarlar onları quranlara heç bir fayda gətirməyib”, – deyə Peskov jurnalistlərə açıqlamasında bildirib.
Peskov həmçinin Estoniyanın Rusiyanı təxribatda ittiham etməsinə də münasibət bildirib.
Onun sözlərinə görə, Rusiyanın sözügedən hadisədə əli olması ilə bağlı irəli sürülən iddialar tamamilə əsassızdır.
“Rusiyanın təxribat törətdiyi barədə səsləndirilən ittihamlar heç bir fakta əsaslanmır”, – Kreml sözçüsü vurğulayıb.
Qeyd edək ki, Estoniya hökuməti ölkənin müdafiə sənayesi müəssisələrindən birində baş verdiyi bildirilən təxribat hadisəsindən sonra təhlükəsizlik tədbirlərini gücləndirərək Rusiya ilə sərhədi bağlamaq qərarı qəbul edib.



