ABŞ federal məhkəməsi Donald Tramp administrasiyası tərəfindən H-1B vizaları üçün tətbiq edilən 100.000 dollarlıq məcburi müraciət haqqını qanunsuz olduğuna qərar verib.
Cagdas.az CBS News-a istinadən xəbər verir ki, hakim 20 ştatın 2025-ci ilin sentyabr ayında qüvvəyə minmiş qərara etiraz iddiasını təmin edib.
Məhkəmə administrasiyanın Konqresin təsdiqi olmadan vergi tətbiq etməklə səlahiyyətlərini aşdığını müəyyən edib. Qərarda qeyd olunub ki, rüsum mahiyyət etibarilə vergidir və mövcud qanunvericilik icra hakimiyyətinə bu cür məcburi rüsumlar tətbiq etmək səlahiyyəti vermir.
Daxili Təhlükəsizlik Nazirliyi qərarı tənqid edərək onu “məhkəmə fəallığı” adlandırıb və rüsumun artırılmasının Amerika işçi qüvvəsini qorumaq və proqram şəffaflığını artırmaq məqsədi daşıdığını bildirib.
Konqres tərəfindən 1990-cı ildə yaradılan H-1B proqramı şirkətlərə ixtisaslaşmış sahələrdə altı ilə qədər müddətdə xarici mütəxəssisləri işə götürməyə imkan verir. İllik kvota 65.000 viza, üstəgəl ali təhsillilər üçün 20.000 vizadır. İşəgötürənlər üçün cari rüsumlar adətən 1700 dollardan 4500 dollara qədər dəyişir.
Trampın ötən il imzaladığı fərmanla əlavə 100.000 dollarlıq ödəniş ABŞ-dan kənarda yaşayan bütün yeni müraciət edənlərə şamil edilib. Ştat koalisiyası iddia edir ki, bu tədbir məktəblərin, universitetlərin və tibb müəssisələrinin ixtisaslı işçiləri cəlb etməsini çətinləşdirir.
Hakim administrasiyanın bu qədər əhəmiyyətli bir ödəniş tətbiq etmək üçün inandırıcı bir əsaslandırma təqdim etmədiyini və federal agentliklərin arqumentlərinin proqram iştirakçıları üzərindəki “əhəmiyyətli vergi yükünü” əsaslandırmadığını müəyyən edərək Federal Posedur Qanununa əsasən ödəniş tələbini tamamilə ləğv edib.(Referans Media)
