Honda və Nissan yeni nəsil avtomobillər üçün əməliyyat sistemini birlikdə hazırlamağı nəzərdən keçirirHonda və Nissan yeni nəsil avtomobillər üçün əməliyyat sistemini birlikdə hazırlamağı nəzərdən keçirir.
Cagdas.az “The Japan Times”a istinadən xəbər verir ki, bazar günü yayılan məlumata görə, əməkdaşlıq imkanlarını müzakirə edən *Honda Motor* və *Nissan Motor* şirkətləri Nissan-ın texnologiyası əsasında proqram təminatı ilə idarə olunan avtomobillər (SDV) üçün ortaq əməliyyat sistemi hazırlamağı nəzərdən keçirirlər.
Proqram təminatı ilə idarə olunan avtomobillərə (SDV) avtonom idarəetmə kimi funksiyalar proqram yeniləmələri vasitəsilə əlavə oluna və ya mövcud funksiyalar daha da təkmilləşdirilə bilər. Əməliyyat sistemi yeni nəsil avtomobillərin əsas texnologiyalarından biri hesab olunur. Buna görə də onun standartlaşdırılmasının iki Yapon avtomobil istehsalçısı üçün proqram təminatının hazırlanmasını daha səmərəli edəcəyi gözlənilir.
Honda və Nissan 2024-cü ildə SDV texnologiyaları, batareyalar və avtomobil təchizatı da daxil olmaqla müxtəlif sahələrdə əməkdaşlıq imkanlarını araşdıracaqlarını açıqlamışdılar. Daha sonra tərəflər mümkün biznes inteqrasiyası ilə bağlı danışıqlara başlasalar da, bu birləşmə baş tutmadı. Buna baxmayaraq, şirkətlər ayrı-ayrı layihələr üzrə əməkdaşlığı davam etdirmək niyyətindədirlər.
Mənbələrin bildirdiyinə görə, SDV texnologiyasının əsas elementlərindən biri olan əməliyyat sisteminin standartlaşdırılması ilə bağlı aparılan müzakirələrdən sonra Honda və Nissan bu sahədə Nissan tərəfindən hazırlanmış texnologiyadan birgə istifadə etmək istiqamətində addımlar atmağa başlayıblar.(Referans Media)
