Qadınlar üçün də pensiya yaşının 65-ə çatdırılması ilə Azərbaycanda pensiya yaşının mərhələli şəkildə artırılması prosesi başa çatıb. Bununla belə, demoqrafik və iqtisadi göstəricilər fonunda gələcəkdə, xüsusilə də kişilər üçün pensiya yaşının yenidən artırılıb-artırılmayacağı müzakirə mövzusu olaraq qalır.
Bəs belə bir qərarın qəbul edilməsi nə dərəcədə realdır?
Cagdas.az xəbər veriri ki mövzu ilə bağlı KONKRET.az-a danışan iqtisadçı Natiq Cəfərli bildirib ki, gələcəkdə kişilər üçün pensiya yaşının yenidən artırılması ehtimalını istisna etmək olmaz.
Onun sözlərinə görə, Azərbaycan pensiya siyasətində əsasən Avropa ölkələrinin təcrübəsini izləyir:
“Belə bir ehtimal var. Azərbaycanda pensiya yaşı ilə bağlı qərarlar əsasən Avropadakı tendensiyalara uyğun formalaşdırılır. Ölkəmizdə demoqrafik vəziyyət də ürəkaçan deyil. Avropanın bir çox ölkəsində pensiya yaşı artıq 67-yə qədər yüksəldilib. Buna görə də gələcəkdə Azərbaycanda da, təəssüf ki, bu təcrübədən istifadə oluna bilər”.
İqtisadçı hesab edir ki, əhalinin yaşlanması, əmək bazarında çalışanların sayının azalması və pensiya sisteminin maliyyə dayanıqlığının təmin edilməsi kimi amillər gələcəkdə bu istiqamətdə yeni qərarların qəbuluna təsir göstərə bilər.
