Prezident İlham Əliyevin Qırğızıstana rəsmi səfəri çərçivəsində keçirilən təkbətək və geniş tərkibli görüşlər, Azərbaycan–Qırğızıstan Dövlətlərarası Şurasının III iclası, imzalanan çoxsaylı sənədlər və əldə olunan razılaşmalar göstərdi ki, iki dövlət arasında əməkdaşlıq iqtisadiyyat, investisiya, nəqliyyat, energetika, humanitar əlaqələr və təhlükəsizlik sahələrini də əhatə edən hərtərəfli əməkdaşlıq mərhələsinə qədəm qoyub.
Cagdas.az xəbər verir ki, bunu siyasi şərhçi Ülviyyə Zülfiqar deyib.
Siyasi şərhçi bildirib ki, Prezident İlham Əliyevin Qırğızıstan Prezidenti Sadır Japarov ilə mətbuata bəyanatı səfərin əsas prioritetlərini və gələcək əməkdaşlığın istiqamətlərini aydın şəkildə ortaya qoydu.
“Prezident İlham Əliyev vurğuladı ki, hər iki ölkə bütün təşəbbüslərdə – həm beynəlxalq platformalarda, həm iqtisadi-ticari sahədə, həm də təhlükəsizliyin möhkəmləndirilməsi istiqamətində bundan sonra da bir-birini dəstəkləyəcək. Dövlətimizin başçısı qeyd etdi ki, imzalanan sənədlər paketi qarşılıqlı fəaliyyətin geniş spektrini nümayiş etdirir. Bu isə onu göstərir ki, rəsmi Bakı və Bişkek siyasi dialoqu praktik əməkdaşlıq layihələri ilə tamamlayaraq əlaqələri daha dayanıqlı və institusional əsaslar üzərində inkişaf etdirmək əzmindədir. Verilən bu mesajlar Azərbaycan ilə Qırğızıstan arasında formalaşmış yüksək etimad mühitini və ortaq siyasi iradəni bir daha təsdiqləyir. Eyni zamanda, göstərir ki, iki dövlət arasında formalaşmış qarşılıqlı etimad və ortaq siyasi iradə növbəti illərdə əməkdaşlığın daha da dərinləşməsi üçün möhkəm zəmin yaradır”, – deyə siyasi şərhçi vurğulayıb.
Ülviyyə Zülfiqar qeyd edib ki, səfərin ən mühüm nəticələrindən biri iqtisadi əməkdaşlığın genişləndirilməsi istiqamətində qəbul olunan qərarlar oldu. Prezident İlham Əliyev mətbuata bəyanatında Azərbaycan–Qırğız İnvestisiya Fondunun maliyyə vəsaitinin iki dəfə artırılaraq 200 milyon dollara çatdırılması barədə razılığın əldə edildiyini açıqladı. Bu addım sənaye, kənd təsərrüfatı, turizm, logistika və digər sahələrdə yeni birgə investisiya layihələrinin həyata keçirilməsi üçün əlavə imkanlar yaradacaq. Qırğızıstanda həyata keçirilən konkret layihələr iqtisadi tərəfdaşlığın real nəticələrini nümayiş etdirir.
“Prezident İlham Əliyevin Mərkəzi Asiya dövlət başçılarının Məşvərət Görüşündə iştirakı ölkəmizin regionla münasibətlərə verdiyi strateji əhəmiyyəti bir daha təsdiqlədi və Azərbaycanın Mərkəzi Asiya ölkələri ilə əməkdaşlığın inkişafına verdiyi strateji önəmi bir daha nümayiş etdirdi. Bu iştirak Azərbaycanın regionun siyasi və iqtisadi proseslərində artan rolunun, eləcə də Mərkəzi Asiya ilə institusional əməkdaşlığının daha da möhkəmləndiyini göstərir”, – deyə o vurğulayıb.
Siyasi şərhçi hesab edir ki, Prezident İlham Əliyevin Qırğızıstana rəsmi səfəri Azərbaycan–Qırğızıstan münasibətlərində yeni inkişaf mərhələsinin başlanğıcını qoyan mühüm siyasi hadisə kimi tarixə düşəcək.
“Səfər zamanı əldə olunan razılaşmalar, verilən siyasi mesajlar və imzalanan sənədlər göstərir ki, iki ölkə arasında əməkdaşlıq uzunmüddətli strateji maraqlara söykənir. Bu nəticələr həm də Türk dünyasında inteqrasiyanın dərinləşməsinə, Orta Dəhlizin inkişafına və Avrasiya məkanında qarşılıqlı faydalı əməkdaşlığın genişlənməsinə mühüm töhfə verir”, – deyə Ülviyyə Zülfiqar fikrini yekunlaşdırıb.(Azərtac)
