Bakı metrosunda sərnişin axını ilə bağlı son göstəricilər paytaxtda ictimai nəqliyyata tələbatın yüksək olaraq qaldığını göstərir. Xüsusilə yay ayları ilə tədris ili dövrünün göstəriciləri arasında ciddi fərq müşahidə olunur.
Cagdas.az xəbər verir ki, 2025-ci ildə Bakı metrosundan ümumilikdə 226 milyon 803 min 167 sərnişin istifadə edib. Bu, gün ərzində orta hesabla təxminən 621 min sərnişin səfəri deməkdir.
Aylıq göstəricilərə nəzər saldıqda isə ən yüksək nəticə oktyabr ayında qeydə alınıb. Həmin ayda metro 21 milyon 998 min 500 sərnişin daşıyıb. Ən aşağı göstərici isə avqustda olub – 15 milyon 23 min 97 sərnişin.
İyul ayında da fərq diqqət çəkir. 2025-ci ilin iyulunda metrodan 16 milyon 192 min 423 sərnişin istifadə etdiyi halda, 2026-cı ilin iyulunda bu rəqəm 16 milyon 698 min 23 olub. Beləliklə, bir il ərzində iyul göstəricisi 505 min 600-dən çox səfər artıb.
Sərnişin axınının tədris ili ilə necə dəyişdiyini isə sentyabr göstəricisi daha aydın göstərir. 2025-ci il sentyabrın 15-də, yeni tədris ilinin ilk günündə Bakı metrosundan 891 min 856 sərnişin istifadə edib. Bu rəqəm həmin il üzrə orta gündəlik göstəricidən təxminən 270 min çoxdur.
Belə fərqin yaranmasında məktəblərin və universitetlərin fəaliyyətə başlaması, tələbə və şagirdlərin gündəlik hərəkətliliyinin artması, eləcə də yay mövsümündən sonra işgüzar fəallığın bərpası əsas amillərdən hesab olunur. Bu il də tədris ili başlayandan sonra sərnişin sayının artması gözlənilir. Ötən tədris ilində ali məktəblərə qəbul üçün 60 489 plan yeri ayrılmışdı. Builki qəbul göstəricilərinin də buna yaxın olması halında on minlərlə yeni tələbə şəhərin gündəlik nəqliyyat axınına qoşulacaq. Bununla belə, onların hamısının metrodan istifadə edəcəyini söyləmək mümkün deyil.
Digər tərəfdən, 2025-ci ilin ən yüksək aylıq göstəricisi olan 21,99 milyon sərnişinə 10 faizlik artım tətbiq edilərsə, rəqəm təxminən 24,2 milyon təşkil edər. Bu, hazırkı göstəricilər əsasında yalnız mümkün ssenaridir və rəsmi proqnoz kimi qiymətləndirilə bilməz.
Eyni hesablama 2025-ci il sentyabrın 15-də qeydə alınan 891 856 sərnişinlik göstəriciyə tətbiq edildikdə isə rəqəm təxminən 981 minə çatır. Bu baxımdan gündəlik sərnişin sayının gələcəkdə 1 milyon həddinə yaxınlaşması da mümkün ssenarilərdən biridir.
Burada əsas məsələ yalnız sərnişin sayının artması deyil, pik saatlarda yaranan yükdür. Aylıq ümumi göstərici yüksək olsa da, sərnişinlərin gün ərzində bərabər paylanmaması müəyyən saatlarda stansiyalarda və qatarlarda sıxlığın artmasına səbəb olur.
Sərnişin sayının gələcəkdə hansı səviyyəyə çatacağı isə əhalinin artımı, tələbə və şagirdlərin sayı, işgüzar aktivlik, şəxsi avtomobillərdən istifadə səviyyəsi, avtobus şəbəkəsinin inkişafı və yeni metro stansiyalarının istifadəyə verilməsi kimi amillərdən asılı olacaq.
Hazırkı rəqəmlər isə göstərir ki, Bakı metrosunda illik sərnişin sayı 200 milyon səviyyəsini xeyli keçib, ayrı-ayrı aylarda 22 milyona yaxınlaşır, bəzi günlərdə isə 900 minə yaxın sərnişin daşınır. Qarşıdakı illərdə bu göstəricilərin hansı istiqamətdə dəyişəcəyi isə paytaxtın nəqliyyat tələbatının əsas göstəricilərindən biri olacaq.(sfera.az)
