Avropa səmasında 12 avqust 2026-cı il tarixində son illərin ən diqqətçəkən astronomik hadisələrindən biri – tam Günəş tutulması baş verəcək. Mütəxəssislərin sözlərinə görə, bu hadisə son iyirmi ildə Avropa ictimaiyyəti üçün ən əhəmiyyətli səma hadisələrindən biri hesab olunur.
Məlumata görə, Qrenlandiya, İslandiya, İspaniyanın şimalı və Portuqaliyanın şimal-şərqində yaşayanlar tam Günəş tutulmasını müşahidə edə biləcəklər. Avropanın digər bir sıra ölkələrində isə tutulma qismən görünəcək.
Avropa Kosmik Agentliyi (ESA) bildirib ki, İspaniyanın şimalı bu nadir təbiət hadisəsini izləmək üçün ən əlverişli məkanlardan biridir. Bu səbəbdən bölgəyə minlərlə turistin və astronomiya həvəskarının axın edəcəyi gözlənilir.
ESA-nın Elm Direktoru professor Kerol Mandell tam Günəş tutulmasının həm elmi, həm də mənəvi baxımdan xüsusi əhəmiyyət daşıdığını vurğulayıb.
“Tam Günəş tutulması milyonlarla insanın eyni anda səmaya baxdığı, heyrət və həyəcan hissini birlikdə yaşadığı çox nadir anlardan biridir”, – deyə o bildirib.
Astronomlar qeyd edirlər ki, tam Günəş tutulması zamanı Ay Günəşi tam örtür, gündüz vaxtı qısa müddətlik qaranlıq yaranır və Günəşin yalnız xarici atmosferi – tacı (korona) görünür. Bu möhtəşəm təbiət hadisəsinin milyonlarla insan tərəfindən izlənəcəyi gözlənilir.(oxu24.com)
